Пашаштлан кӧра чапше

Мемнан дене регионышто селасе пашаеҥ-влакым Российыште перерабатыватлыше промышленность да ялозанлык пашаеҥ-влакын кечышт годым огыл, а Калыкын икоян кечыж деч ончыч чапландарат. Тидыже элыште ялысе пашаеҥ-влакын пайремышт Республикын кечыж дене лачеш толеш. Ты поро йўла шукертак пеҥ гыдемын.

Районышто тений ялозанлык пашаеҥ -влакым чапландарыме шотышто пайрем чыла санитарно-эпидемиологический йодмашым текшырымаште эртен. Тидлан амалжат уло – коронавирус пандемий. Райрўдӧ Культура пӧртын залышкыже организатор-влак 50 еҥ ым гына ўжыныт. Тыште тўҥ шотышто ялозанлыкыште ятыр ий пашам тыршен ыштыше еҥ -влакым наградитленыт.

А художественный самодеятельностьын участникше-влак нунылан кугу пайрем концертым ончыктеныт. Тематикыжат келшыше лийын – ял, села, шочмо-кушмо вер да калыкын икоян улмыжо. Тиде мурызо-влак лийыныт.

Тений «Восход» СХК гыч пашаеҥ -влакым шуко чапландареныт. Нуно районысо чыла показатель почеш ончылно улыт. Пытартыш лу ий нуно кушкылым ончен куштымаште ончылно каят. А теве тений озанлыкын киндым ончен куштышыжо-влак шке вуйышт деч кўшкырак тӧрштен кертыныт – районын историйыштыже шурным эн шуко поген налыныт. Ик пасу гыч икияш шыдаҥ ым гектар гыч 60 центнер дене налыныт. Куснылшо кубок ден Дипломым РДК-ын сценыштыже район администраций вуйлатышын пашажым шуктен толшо Ю.М. Садыров озанлыкын агрономжо Е.К. Зайнитдиновлан кучыктен. Эрлашыжым Уфа олаште Егор Камитдинович Зайнитдинов «Башкортостан Республике ялозанлыкын сулло пашаеҥже» почетан лўмым пуымо нерген свидетельствым налын. Тудлан тудым республике вуйлатыше Радий Хабиров кучыктен. Пашажлан кӧра чапше, чын да сулен налме награде. «Восход» СХК-ште кушкылым ончен куштымаште тыште тудын надырже кугу. Агроном Егор Зайнитдиновлан кєра рекордыш шуымо.

Ты озанлыкын эше икмыняр пашаеҥ жым палемдыме. Агропромышленный комплекс системыште ятыр ий пашам тыршен ыштымыжлан Башкортостан Республике Кугыжаныш Погын – Курултайын Чап грамотыжо дене ушкалым лўштышӧ Расима Тимиртдиновна Камалитдинова да механизатор Николай Сергеевич Исашев, а Кугыжаныш Погынын вуйлатышыже деч Тауштымашым Камиль Тимирьянович Мухаматвалеев да вакшызе Александр Апканиевич Шуматбаев палемдалтыныт. Николай Сергеевич Исашев эше БР ялозанлык министерствын Чап грамотыжо дене палемдалтын.

«Восход» СХК-ын пашаеҥ же-влак дене пырля Республике минсельхозын Чап грамотыжым налыныт: «Победа» ООО-ын механизаторжо Андрей Геннадьевич Ахмадыршин, Бикмурзин КФО-ын бухгалтерже Алефтина Петровна Благодарова, Кумушбаев КФО-ын вольыкым ончышыжо Вячеслав Лекандрович Васильев, ИКЦ-ын водительже Сергей Паклюсевич Мазитов, Казанчеев КФО-ын ушкалым лўштышыжє Люция Сайтаевна Файзуллина, Зайникаев КФО-ын механизаторжо Фируз Рифович Хасанов.

Тыгак озанлык да районын пашаеҥ же-влак коклаште паша таҥасымаште сеҥыше-влакым чапландареныт. Район администрацийын пунчалжын мемнан газетнан ты номерыштыже 2-шо лаштыкыштыже савыктыме. Иктым палемдыме шуэш, комбайнер-влак коклаште тений КФО вуйлатыше Михаил Александрович Казанчеев палемдалтын. Тудлан район администраций вуйлатышын Чап грамотыжым да «Чемпион жатвы – 2020» шарнымаш лентым кучыктымо.

Тыгак пайремыште «Ава чап» медаль дене палемдалтше ава-влакымат чапландареныт.

Нунын коклаште Васола ял гыч Эвелина Валерияновна Бикмурзина, ешыште 8 икшыве кушкеш, Павасола ял гыч Александра Радиковна Гараева, Краснохолмский села гыч Людмила Вячеславовна Тимирханова да Резеда Габдрашитовна Хабибрахманова. Район администраций вуйлатышын пашажым шуктен толшо Ю.М. Садыровын кидше гыч медальым, тыгак пӧлек ден пеледышым налыныт. Нунын лўмеш муро-влак йоҥ геныт.

Пайремыш ўжмӧ уна-влакым шке концерт номерышт дене мурызо-влак Ринат Хайдаров, Лилия Матвеева, Кристина Русиева, Виктор Карасев, Валентина Гиздельханова, «Эрви» калык куштыман ансамбль, «Овация» йоча куштымаш коллектив, «Кумыл» гармончо-влак ансамбль да «Зангари» фольклор ансамбль куандареныт.

Ю. Шамсутдинов.