Пайдале каҥаш

Мӱй нерген чылан палат, очыни. Тудо айдемын организмжылан моткоч пайдале, да кече еда кочкаш темлалтеш. Но мӱйым кузе чын кочкаш – чыланак огыт пале. Правил-влак неле огытыл, сандене нуным шукташ нимо йӧсыжат уке.

Эн ончыч суткаш нормо шотышто мутым луктына. Эсогыл эн пайдале кочкышат икшырымылыкым йодеш. Кугыеҥлан суткаш нормо – кочмо 2-2 пане кугыт, йочалан – ик-кок чай пане. Тынарыже организмыште витамин дене микроэлемент-влак шапашым ышташ тӱрыс сита.

Мӱйым кочмо деч пел шагат ончыч кочкаш кӱлеш. Шужымо мӱшкыреш кочмо шере мӱй тыланда вий-куатым, чулымлыкым пуа. Тиде тутло кочкыш кече еда организмыш логалеш гын, иммунитетым пеҥгыдемда да кылмыме деч арала. Мӱйыш эше тӱрлӧ ешартышым: эхинацейым, пантым, куэдуҥгырым (чага) йошкарвожым, кишым – пышташ гын, пайдалыкше ятырлан утларак лиеш.

40 градус деч шокшышто мӱйым шулыктареда але чот шокшо вӱдыш пыштеда гын, тиде шере кочкышын пайдале улмыжо йомеш. Мӱйым иканаште ида нел – умшаштыда ик жап кучыза. Лачак умшавомышто продукт гыч фермент-влак лектыт. Тудыжо углевод-влаклан писынрак шыҥдаралташышт йӧным ышта.

Мӱйыштӧ шуко шекар уло, сандене кочмо деч вара умшам шӱалташ але эрыкташ кӱлеш. Тидымат шотыш налаш уто огыл: мӱйым тӱҥ кочкыш дене пырля кочкыда гын, уто нелытым погеда. Тыгодымак эше организмыште кочкыш шулымо йӧн дене пайдале вещества-влак шыҥыме начарештыт.

Южо чер годым мӱйым кочкаш ок йӧрӧ. Мутлан, пеледыш мӱйлан аллергий, пӱсӧ гастрит але панкреатит, пагарыште але шолышто пуалме (язва) , шекшыште але шондыгалташте кӱ улмо, капын температурыжо чот кӱзымӧ (38 градус деч утла) годым.