10 ноябрь – РФ элкоргӧ паша органын пашаеҥже-влакын кечышт

Полицийын кажне пӧлкаже дежурный часть гыч тӱҥалеш. Лач нунын писылыкышт деч осал пашам вашке почмаш, южгунам гын, айдемын тазалыкше да илышыже шогат.

Садлан, очыни, тиде паша вуйын шогыман гына огыл, тыгак тӱткылыкым йодеш. Молан манаш гын, дежурный частьышке калык тӱрлӧ йодыш дене толеш. Южик случайыште полиций пашаеҥ-влаклан психологат лияш кӱлеш, кажне еҥ дене кылым муын моштымн.

Россий МВД-ын Калтаса районысо пӧлкажын дежурный частьыштыже оперативный дежурный-влак – полицийын майоржо Шакиртов Леонид Робертович, старший лейтенант Шакиев Игорь Олегович, старший лейтенант Зарипов Марат Фаритович, лейтенант Махмутов Рустам Рамилович тыршат. Тыгак нунын полышкалышышт-влакат – старший прапорщик Сайпушев Вадим Федорович, прапорщик Исакаев Андрей Николаевич, прапорщик Иргибаев Анатолий Михайлович, сержант Шамыкаев Алексей Вячеславович – улыт.

Водитель-влак кеч-кунамат кеч-могай адрес дене осал пашам ыштыме верышке лектын каяш ямде улыт. Тиде – старший сержант Юрий Витальевич Симанаев, сержант Якупов Алексей Игорьевич да стажер Ирбулатов Андрей Леонидович.

Дежурный частьышке пурышо йодмаш-влакым лӱмын ыштыме журналышке возат. Кӱлеш годым следственно-оперативный группым ыштат да тудо осал пашам ыштыме верышке кая.

Дежурный часть, шокшо точка гай: телефон кеч-могай жапыште – йӱдым але эрдене, каныш але пайрем кече, чыла тидым шотыш налде, йыҥгыртен кертеш. Сандене дежурный-влакын сменышт 8.00 эрдене тӱҥалеш да 8.00 эрдене пыта. Южгунам калык полиций паша дене кылдалтдыме йодыш-влак денат полицийыш толеш. Конешне, шолыштмаш, кредалмаш, автотранспортым шолыштмаш шотышто увертарымаш-влак пурат. Осал паша нерген увер-влак тӱҥ шотышто эрдене пурат, а теве ешыште тумам тӱҥ шотышто кастене нӧлталыт.

– Суткаште кокла шотышто 12 вызов пура, – каласкала мыланна тиде кечын дежурствышто лийше полицийын лейтенантше Рустам Рамилович Махмутов. – Тӱҥ шотышто тиде – шолыштмаш, ешыште туманлымаш, ДТП. Кеч-могай уверланат жапыштыже реагироватлаш кӱлеш.

Рустам Рамилович Россий МВД-ын Калтаса районысо пӧлкашкыже 2014 ийыште пашашке толын. Ончыч дежурный частьын водительже лийын ыштен, вара – оперативный дежурныйын полышкалышыже. Паша деч кӱрылтде юридический образованийым налын. Дипломым налмеке, ик жап участковый лийын тыршен, вара адакат дежурный частьышке куснен, ынде оперативный дежурный семын.

Тиде кечын тудлан Иргибаев Анатолий Михайлович полшен. Мемнан мийымына годым тудо телефон дене увертарымашым налын. Тудым пашаж деч ышна кӱрыл. Пӧлкаште Анатолий Михайлович 2005 ий гыч тырша, а дежурный частьыште – 2014 ий гыч.

Дежурный частьыште случайный еҥ пашам ыштен ок керт. Тыште шке пашаштым сайын шуктышо да палыше профессионал-влак веле тыршат.

Э. Мурсакаева.