Графскыште – у ФАП

У модуль ФАП-ым почмаш Графск ял калыкылан куанле да моткоч кўлешан событий. Нунылан веле огыл, тыгак пошкудо Шарип ял гыч калыкланат.

Коронавирус пандемий эше ик гана наглядно ончыктен, айдемын илышыштыже здравоохранений сфере деч нимо кўлешан уке. Политике, экономике да моло ятыр общественный институт-влак деч поснат ок лий. А вет кунам айдеме черлана, поснак кызыт, кунам эл мучко пандемий мия, нунын кўлешлыкше нерген ме мондена. Кызыт элыште здравоохраненийым пеҥгыдемдыме шотышто шуко ышталтеш. Иктыже куандара, тидын годым села ден изи ял-влак нергенат огыт мондо. Элнан президентше Владимир Путин шке выступленийлаштыже ФАП да поликлинике-влакым вияҥдыме да пеҥгыдемдыме нерген ойлен. Лач нуно чер-влак ваштареш кучедалмаште да профилактика пашам намийымаште ончылно улыт.

Графск ялыште ФАП-ым почмаш чыла санитарно-эпидемиологический йодмашым текшырыме почеш эртен. Район администраций да Келтей ялсовет, депутат-влак ўжмӧ уна-влак лийыныт да ял гыч икмыняр еҥ лийын.

Ялыште илыше калыкым да унамытым у ФАП-ым почмо дене район администраций вуйлатышын алмаштышыже Е.А. Алексеева саламлен.

– Тений районышто ныл у модуль фельдшер-акушер пунктым чоҥымо, – палемдыш Елена Анатольевна. – Ты пашам умбакыжат шуйымо лиеш. Яллаште чыла ФАП-ым, ты зданий-влак нормативын йодмашыжлан келшен ок тол але аварийный улыт гын, уэмдаш палемдалтеш.

Калтасасе райрўдӧ эмлымверын тўҥ врачше Равиль Венерович Зариповат ял калыкым тыгай кўлешан событий дене шокшын саламлен да У ФАП-ым почмо дене Графск да Шарип яллаште илыше калыкым медицине велым обслуживатлымаш саемеш манын, ўшанен каласен.

Келтей ялсовет вуйлатыше Ульяна Евгеньевна Батыршина район администрацийлан, райрўдӧ эмлымверлан пашам организоватлаш полшымыштлан, подрядчик-чо‰ышо-влаклан таум каласен. Ял калык лўм дене верысе Советын депутатше Валерия Дмитриевна Жижина выступатлен. Тудо палемден, у модуль ФАП-ым почмаш ял калыклан – ик эн куанле событий.

Мутат уке, у ФАП-лан фельдшер Татьяна Сатиевна Семенкина моткоч куанен.

– Икымше гана Графскыш фельшер семын мый 1980 ийыште толынам, – ойла тудо. – 10 ий пашам ыштенам. Тунам эше колхоз лийын, пасулашке, фермылашке лектын коштынам. Мыйын участкыштем эше Кельтешка ял ыле, тудо ынде мемнан районнан картше гыч йӧршеш йомын. Вара икмыняр жаплан мый каенам ыле. Угыч пӧртыльым. 2002 ий гыч фельдшер лийын пашам ышташ тўҥальым. Кызыт кок ялыште – Графскыште да Шарипыште – калыкын тазалыкшым текшырем. Тыгак арнялан ик гана Чомар ялыш лектам, тушто кызыт фельдшер уке. У ФАП-ым чоҥымылан чот куаненам. Волгыдо, шокшо – пашалан чыла условият уло. ФАП-ыште пашам ышташ чыла аппаратура уло.

Ю. Шамсутдинов.