Шотыш налза

Шуко еҥын, поснак олаште илыше-влакын, шонымашышт тыгай: мӱй вишкыде гын, тугеже тудо сай качестван. А теве пеҥгыдемын, шинчын, шекараҥын гын, тугеже начар продукт.

Чынжым гын тыгай шонымаш йӧршеш йоҥылыш. Тыге чын огыл шонышо-влакын ӱшанышт дене пазарыште мӱйым ужалыше осал чонан еҥ-влак пайдаланат. Нуно кодшо ийысе пеҥгыдемше мӱйым ырыктен шулыктарат, тыге налшын кумылжым шуктат. Ырыктыме мӱй кокымшо гана уэшыже ок пеҥгыдем. Эше палемдыме деч кугырак шокшышто ырыктыме годым мӱйыштӧ пайдале вещества-влак йӧршешлан йомыт, пытат.

Мӱй молан пеҥгыдемдыме примерым кондена. Ик мӱкшызын август тӱҥалтыште кӱзымӧ мӱйжӧ пеш писын, 1,5 арня гычак пеҥгыдемаш тӱҥалын. Отарже эре верыште шинчыше, да нектарым йыр кушшо кушкыл пеледышла гыч нумалыныт. Тугеже мӱйжӧ пеледыш гыч погымылан шотлалтеш. Атыш темкалыме мӱйжӧ пӧртончылно шинчен, тыгодым игече юалге шоген. Мӱй юалге пӧлемыште шинча да южын температурыжо йӱдым 10 градус леве деч ӱлыкыла вола гын (тунам лач тыге лийын), мӱй пеш писын пеҥгыдемеш, шинчеш.

Кокымшо амаллан мӱйым могай пеледыш гыч погымым шотлыман. Тиде мӱкшызын отарже воктенак рапсым да кечшудым ӱденыт улмаш, кум километр коклаште горчицым ончен куштеныт. Пален нальым, тыгай кушкылла гыч погымо нектар (варажым мӱкш-влак тудым мӱйыш савыреныт) пеш писын пеҥгыдемеш. Тугеже палышаш улыда: пеҥгыдемше мӱйым налыда гын, тыгай сату чынжымак сай качестван, вес семын каласаш гын, натуральный. Южо мӱй мутлан, акаций гыч погымо гын, идалык марте ок пеҥгыдем. Тидымат палаш уто огыл.