Пушеҥге гыч пўчкеден ыштыме пашан мастарже

Улыт тугай еҥ-влак, кӧ иктаж-могай арвер гыч искусствын ӧрыктарыше произведенийжым ыштен кертеш. Нунын кокла гыч иктыже – Кӧкыш ял гыч Евгений Иликбаев. Стамескым кидышкыже налын тудо пушеҥге гыч тўрлеман атышӧрым, фотолан рамкым, пеледышым шындаш подставкым – икманаш, чыла ўзгарыш савыра. Ме тудын дене уналыкыште лийна.

Евгений Илтубаевич мемнам шкенжын мастерскойыштыжо вашлие. Тыште пушеҥге пуш шижылтеш. Кугу огыл пӧлемыште мўкш омарта-влакым ышта ыле. Пашаже тудын ятыр: мўкш омарта, тӧрзалан рамым, наличникым да молымат ямдылымаш – чылажат ты мастерскойышто ышталтеш. А изи ўзгар-влакым тудо кастене пӧртыштыжӧ ышта.

Ты сомыллан Евгений Иликбаев шукертак тунемын. Чылажат ик туткар гыч тўҥалын. Тунам тудо йолжым туген. Конешне, гипс дене пашам ышташ ок лий. Паша деч посна яра шинчаш огыл манын, ала-мом пўчкедаш, ыштылаш тўҥалын.

– Ты икымше ошкылым ышташ мыйым ковамын мутшо таратыш, – ойла Евгений Иликбаев. – Тунам тудо пу гыч ыштыме пӧртын тӧрзаже пўчкеден ыштыме наличник-влак дене сӧрастарыме лийшаш манын каласыш. Тыге мый кидышкем пискым, товарым нальым. А эше изем годсек товар дене пашам ышташ, сўретлаш йӧратенам.

Тунам мый икымше наличникым ыштышым. Тидыже мыйым ончыкыжым мастарлаш кумылаҥдыш. Эше тидым палемдаш кўлеш, ту жапыште тўҥалше мастерын тўрлӧ инструментше лийын огыл. Сандене тўҥ шотышто писке дене пашам ыштен. Кид дене ышташ жап ятыр кўлеш. Но ты паша тудлан моткоч келшен. Таче мемнан геройнан электропилажат, электролобзикшат, стамеске-влак наборат, резак-влакат улыт.

– Стамеске деч посна кузе ончыч пашам ыштенам, – инструмент-влак набор ден икмыняр пашажым ончыктен ойла Евгений Илтубаевич. – Тиде мыйын. Мыйын шўм-чонемлан келшыше паша, яра жапат уло. Паша деч посна шинченат ом керт. Мылам эре иктаж-мом гынат ышташ кўлеш. Пўчкедем иктым, вес ўзгар ямде кия, вашталтем, адак угыч пўчкедем…

Мастерын коллекцийыштыже гардине, оҥай шырчык омарта, почто яшлык, пўкен да молат улыт. Шуко пашаже йолташыж ден родо-шочшыж-влакын пӧртыштым сӧрастарат.

– Еҥ-влакат заказ дене толыт, – ойла тудо. – Трафаретлан нунылан келшыше шке сўретыштым кондат. Мый нуным кугемдем, шке сўретлем, пўчкедем. Чыла тиде паша мыланем модмем гай чучеш.

«Шке мастарлыкланда те иктаж шочшыдам туныктынеда?» йодышлан Евгений Иликбаев шоналтыде каласыш:

– Иктаж-кӧн тыланымашыже уло гын, молан туныкташ огыл. Уныкам-влак эше изи улыт. Ала илен-толын нуно мылам сўретлаш полшаш тўҥалыт.

Мастарын чыла тўҥалтышыштыже Римма ватыже полша, тудо шке пелашыж нерген лач порын да шокшын гына ойла.

– Тудлан ты паша келша. Пушеҥге дене пашам ыштымыж годым кумылжо нєлталтеш. Евгений Илтубаевичын ик шонымашыже уло. Кузе ойлат, кидпашалан мастар ик верыште ок шогылт, иктаж-мом уым шымлаш тырша. Мемнан геройна шартне воштыр да кагаз трубка гыч пунаш тунемнеже. Тыланымаш уло гын, чылажат миен лектеш.

О. Айгильдина.