Калтаса ужара
+17 °С
Пылан
Все новости
Новости
15 Кылме 2020, 11:10

Вичкыж ийыш ида пуро!

Ий ўмбалне шкетын ида кошт.

Шыжым вўд воктене лўдыкшыдымылык правил-влакым текшырыдымаш икшыве да кугыеҥ-влаклан кугу эҥгек лийын кертеш.
Ты кечылаште региональ, тыгак российысе канал дене Башкирий гыч йўдвелыште вахте йӧн дене пашам ыштыше пӧръеҥын вўд гыч йочам утарыме нерген ончыктеныт. Геройна Сибай ола гыч Андрей Горьков лийын. Шке ойлымаштыже тудо ийын вичкыж улмыжым пален, туге гынат шуко шонкалаш жап лийын огыл, вет ий йымаке йоча пуреҥгаен.
«Мый шкежат шуко икшыван ача улам, кум эргым уло, а тыште икшыве вўдеш пурен каен. Луктым тудым, ала-могай ўдырамаш тольо воктекем, нунын кушто улмышт нерген мый «вашке полыш» врач-влаклан информацийым пуышымат, пашаш кайышым», – каласыш Андрей.
Йочам утарыме нерген видеом соцсетьлаште савыктыме лийын. Кадрыште раш коеш, пӧръеҥ мўшкыржӧ дене нушкын лаке тўрыш мия, вўд гыч эргым шупшыл луктеш да сер воктеке наҥгая. Пӧръеҥ шотло жапыште ийыште айдемым утарыме годым МСЧ-ын чыла темлымашым шукташ, тыге тудын илышыжым утарен кода.
Ноябрь гыч декабрь марте ий вичкыж. Касвелеш але йўдым йўкшемдыме деч вара тудо кугу огыл нелытымат ок чыте, а кечывалым гын, лева, шўштыра лиеш.
Россий МЧС ушештара, 7 см кўжгытан ий ик еҥлан гына лўдыкшыдымӧ лиеш, а 15 см да утларак кўжгытан ий годым тўшка дене кошташ лиеш. Ийын кўжгытшӧ чыла вере икгай огыл, эҥер тўҥалтыште да притоклаште ийын кўжгытшӧ вичкыжрак. Эн вичкыж ий – лум пургыж йымалне, вондер ден омыжла воктене да вўдпорсын коймо верыште.
Ийын кўжгытшым тудын тўсшӧ гыч раш палаш лиеш. Пеҥгыдын леведалтше ий кандырак але ужаргырак тўсан. Эҥер ўмбал ош але нарынчырак тўсан гын, тушко але пураш эше эр, ий вичкыж.
Туткарыш логалаш огыл манын, мом ыштыман?
– Тендан йымалне ий катлен да вўдыш верештында гын, паникыш ида логал. Кок киддам шарен, воктенда улшо пеҥгыде ийым сайын руалтен кучыза да вўдйымак вуйге пуреҥгаяш ида тырше. Эн тўҥжӧ – ийым чотрак кучаш кўлеш. Уто движений деч посна воктенда улшо ийыш кўзаш точыза: оҥ дене нужса, тиде жапыштак вўд гыч капдам йол дене шўкен лукташ тыршыза. Шекланыза: вийда савырнен ынже воч, тунам вўд гыч утлаш нелырак лиеш.
– Вўд гыч лекмек, писынрак серышкыла нушкын кайыза. Тушкыла нужса, кушеч толында. Серыште лумеш пєрдал налза, тыге кукшо лум вургем гыч изишак ночкым шкеж дек шупшылеш. Вара писын шокшо верыш куржса да вургемдам вашталташ тыршыза.
– Полышым ўжса. Еҥын пуреҥгайымыжым ужын шуктенда гын, вигак 112 номер дене йыҥгыртыза.
Ий ўмбалне шкетын ида кошт.
Мемнан корр