Мемнан район республике прессе лаштыклаште

Калык ансамбль чоным савыра

Лийыт тугай кече-влак, кунам изирак Сылвий ялын калыкше кок але кум гана шукемеш. Ялысе клубышто сай верым налаш, тышке иктаж-могай мероприятий тӱҥалме деч ончыч ик шагат ончыч толаш кӱлеш. Верым налаш вараш кодат гын, омса воктене шоген сценыште мо лиймым ончаш перна. А сценыште – «Райдем-райдем» фольклор калык ансамбль.

– Кузерак мемнан деке толын шуында? – йодеш мемнан дечын ансамбльын вуйлатышыже да тудым негызлыше Анжелика Юкчубаева. – Ковер-самолет дене чоҥештен толда, очыни. Корно мемнан начар вет.

Чынжымак, корно уке. Но мутланымашнам тиде йодыш гыч тӱҥалме ыш шу.

– Корно гына огыл, мемнан дене кевытат уке. Тӱрлӧ сатулан пошкудо яллашке кеҥежымат, кугу кемым чиен, каяш логалеш. Мемнан концертышке толшо уна-влак ончылно йӧндымын чучеш. Юбилей вашеш теве клубнам олмыктышна, вет тений мыланна кумло ий темеш. Клубым ППМИ-те участвоватлымылан кӧра, олымыктышна.

Ансамбльыште калык тӱрлӧ – ончычсо доярке, туныктышо, механизатор-влак – чылаже 15 еҥ. Сулен налме канышыш лекмеке, нуно мураш да кушташ, икманаш творчестве дене заниматлалташ шонен пыштеныт. Нунын коклаште ӧрыктарыше илыш-корнан еҥ-влакат улыт. Шукерте огыл уло ял дене Абдулай Вахитовын шӱдӧ ияш юбилейжым палемденыт. Тудын мурыжо-влак концерт программыште ик эн йӧратыме да вучымо улыт.

– А паледа, мый нуным кушто шоненам? – шыргыжалын пелештыш ветеран. – Немыч пленыште лийынам да ойгырымем дене жапым кузе гынат эртараш манын, шоненам. Ончалаш гын, мемнан шуко мурына кована-влакын шондыкышт гыч. Тушто южгунам аклаш лийдыме поянлыкым муаш лиеш.

… Калык дене тич темше залыште тул йӧрна. Сценышке «Райдем-райдем» ансамбль лектеш. Марий муро ден куштымашлаште чоным савырыше ала-мо уло. Барабанын мӱндырчын шоктышо йӱкшӧ, духовой инструмент-влакын мӱгырымышт, куштымаште йол йӱк – чыла тиде кугезына-влакын костер воктене мурен-куштымыштым шарныктара. Ме южгунам калык культурым огына акле. Лач тыгай концертлаште лиймеке веле вес семын ончаш тӱҥалат. Арам огыл, очыни, коллективлан калык ансамбль лӱмым пуымо. Уфа, Дӧртӧльӧ олалаште, Калтаса селаште нуно тӱҥ приз-влакым сеҥен налыныт. Туге гынат, ик эн тӱҥ аклымаш тиде – клуб тич калык. Шуко мурым зал дене пырля мурат. Чыла ойго ден келшыдымаш мондалтеш, южгунам лавыра корно дене мєҥгеш каяш кӱлмат вуй гыч лектын возеш.

– Молодец, Николаевна, – Марина Измайлова дене палымыже лишемеш. Умбакыже мыланна умыландара:

– Кандашлу ияш улеш манынат от каласе!

– Тиде кӧлан кандашлу?! Мыланем?! – шыдешкен пелешта Марина Николаевна. – Каена, ончалына, кӧ кӧм куштен сеҥа.

Калык клуб гыч каяш ок вашке. Южышт икте-весышт дене ятыр жап ужын огытыл, уло мо нерген мутланаш.

Тиде кас шукылан куаным конден.

А. Ничков.

(«Башкортостан Республике» 127 №,

3 ноябрь).