Тиде шӧртньӧ правилым Елизавета Бикбатурова студент жап гычак пеш сай шарнен кодын. Тунам тудо Свердловскысо областной медучилищыште тунемын. Тиде мутым чӱчкыдын старший преподаватель, ийготышто улшо ӱдырамаш ойлен. Тудо психологий дене спецкурсым вӱден. Сандене Елизаветат тудын деке толшо черле еҥ-влакым эм да укол дене гына огыл эмлаш тырша, тыгак нунылан поро мутымат муэш.
– Тиде шӱм-чон да поро мут терапий, – шыргыжалын ойла мыланем Елизавета. – тудын дечат шукыжо шога. Поснак поро мут да поро шӱм-чон илалше еҥ-влаклан шерге да пайдале.
Елизавета шуко икшыван ешыште кушкын. Сандене тудо изиж годсекак мо тыгай порылык, чын лиймаш да лишыл еҥлан полыш кидым шуялтымаш, пеш сай пала. Сандене школым тунем лекме нерген кидыш аттестатым налмеке, вигак медучилищыш тунемаш пура. Мединститутыш экзаменым вигак сдаватлаш тоштын огыл, можыч, конкурсым ом эрте манын, шоналтен. Студент жап пеш писын эртен каен. Выпускницым Свердловский медицинский научный рӱдерын процедур кабинетышкыже медшӱжарлан пашашке колтеныт. Тыштак тудо шкенжын илыш пелашыжым – Уральский ялозанлык академийын выпускникше Федор Бикбатуровым – вашлийын. Федорат тудын шочмо Шоръялже гыч лийын.
Федор нерген икмыняр мутым посна каласен кодымо шуэш. 2000 ийла тӱҥалтыште ме офсетный печать станокым нална. Но тудым пашашке наладчикат, фирмын специалистшат колтен кертын огыл. Мый Федорын автоматике ден механикым сай палымыжым паленам да тудым мыланна полшаш йодынам. Ик арня гыч мемнан станокна пашам ышташ тӱҥале. Елизаветан пелашыже Кулибин гаяк улеш.
Олаште кеч-мыняре сай лийын гынат, самырык еҥ-влакым шӱм-чонышт шочмо кундемышкышт шупшын. Федор Калтасасе сельхозтехникыш пашашке пурен, Елизавета 2 №-ан Калтаса кыдалаш школышто медшӱжар лийын тыршаш тӱҥалын. Кунам Краснохолмский селаште ветеран-влаклан санаторий-профилакторий почылтын, Елизавета уло кумылын тушко пашашке каен.
Ветеранмыт тудын пашаж дене келшеныт. Медшӱжар илалше еҥ-влак дене мутланаш йӧратен, нуным тӱткын колыштын, южгунам гын, нуным неле шонымаш деч кораҥдаш полшен. Ик жап гыч тиде моткоч сай да кўлешан заведенийымат петыреныт. Мом ыштет – чыла вере оптимизаций.
Туге гынат сай специалист-влак чыла вере кӱлыт. Елизаветалан Павасоласе фельдшер-акушер пунктышто пашам темленыт. Теве ынде икмыняр ий почела тудо тошто девяткыж дене эрдене эрак пошкудо ялышке йӱр ден лумым шотыш налде, пашашке вашка.
– Ме Елизавета деч посна нигузе огына керт, – ойла Павасола ял калык. – Тау тудлан. – Системым шындымыж годым ме нимомат огына шиж, – ойлат илалше еҥ-влак. – Тудын кидше моткоч куштылго, тек тудлан Юмо эреак тазалыкым пуэн шогыжо…
Тыгай поро да шокшо мут-влакым мый ял калык деч кольым.
Пашаже шуко гынат, Елизавета чӱчкыдын шке шинчымашыжым кӱкшемдаш тырша. Тений кеҥежым пелий наре Уфаште у программе дене квалификацийым кӱкшемдымаште шинчымашым поген. А теве теҥгече сертификатым налын. Ме тудым уло кумылын саламлена.