Шўм гыч лекше поро мут дене

Тўняште мемнан шонымо семын нимоат огеш лий. Чыла пўрымє семын кая. Теве самырык ўдыр шочмо Туркменистан деч тўжем дене километр ӧрдыжто илаш да пашам ышташ тўҥалмыж нерген шонен мо?

Римма Фадисовна Исламгалиева Туркменистан республикыште Небит-Даге олаште шочын да кушкын. Школышто тунемын, Пионер-влак пєртыш занятийлашке куржталын, тыште сўретлаш, йўлатылын сўретлаш тунемын. 8-ше класс деч вара шўдылен ўдыр ден эрге профессийым налаш лийыныт, тудат шочмо олаштыже нефтяной техникумыш тунемаш пура. Техник-механик специальностьым налын, а пашам ышташ Римма Фадисовнам самырык специалист семын, Казахстаныш колтеныт, тыште Актау олаште 11 ий тыршен. Сай паша, мотор ола, тыште Совет Ушем гыч, тыгак йот элла гыч самырык-влак тыршеныт, рвезе годсо жап, ончыкылык илышлан план…

Совет Ушем шаланыме деч вара илаш у верым ойыраш логалын, тыге Римма Фадисовна шке акаж дене Краснохолмский селаш толеш. 1996 ийыште мемнан школышто библиотекарь лийын пашам ышташ тўҥалеш. Ласка, поро кумылан, пашам йӧратышан, школ библиотека пашалан вигак тунем шуын, квалификацийым кўкшемдыме курс-влак эртен, компьютер дене пашам ышташ тунемын, изи йоча-влаклан мероприятийым эртараш сценарий-влакым возен, литература да савыктыме изданий-влакын тематический выставкыштым ямдылен, стендым оформитлен да тўҥалтыш школышто пайрем мероприятийлаште роль-влакым модын. Изи да йўштє библиотекыште пашам ышташ неле лийын, тыште йўдымат ведраште вўд кылмен. А вет икшыве-влакым книгам йӧраташ, тудым «эмлаш», полкылаште кўлшӧ томым муаш туныктымаш кўлын. Тидым волгыдо пӧлемыште, поро кумылан библиотекарь пелен гына ышташ лиеш. Сандене библиотекыште икымше ошкыл – тиде пӧлемым сӧрастарымаш, тыште волгыдо, ару, шып лийшаш, тудо икшывым книгам лудаш таратышаш, лудмаште шкаланже уым, оҥайым пален налшаш.

Библиотекарьын эше моло ятыр пашаже уло. Мутлан, кажне икшывылан книга ситышаш. Римма Фадисовна тидын шотышто чылажымат ышта. Тудын тыршен ыштымыжлан кӧра, школ йыр кеҥеж мучко тўрлӧ деч тўрлӧ пеледыш-влак кушкыт, школышто кажне пачашыште изи сад уло, тудо кажне олимпиадылаште вуйын шогышо наблюдатель.

Римма Фадисовна сай библиотекарь да пашаеҥ, тыгак тудо чапле ава, ўшанле йолташ да ака улеш. Сай озавате тўрлӧ деч тўрлӧ, тамле деч тамле кочкыш-влакым шке ешыжлан ямдылаш йєрата, пєрт кєргыштыжат тудын эре волгыдо, ару да шокшо.

Пагалыме Римма Фадисовна! Тиде ноябрь кечын мемнан 2 №-ан Краснохолмский кыдалаш школын коллективше Тендам чапле юбилейда дене саламла. Тыланда пеҥгыде тазалыкым, кужу ўмырым, сай кумылым, илыш пиалым тыланена.

2 №-ан Краснохолмский кыдалаш школын коллективше.