Мемнан вел рвезевлак тыге служитлат

Ик гана веле огыл ме газетнан лаштыклаштыже мемнан район гыч срочный службым эртыше рвзе-влак нерген возенна. Мемнан районын шочшыжо-влак нерген поро мутым колаш кеч-кунамат кумылло.

Мемнан район гыч призывник-влак уло кумылын служитлат, кӱкшӧ результатлашке шуыт, кызытсе жаплан келшен толшо техникым шымлат.

Тидын нерген рвезе-влакын служитлыме частьла гыч ача-ава-влаклан толшо серыш-влак ойлат.

Шукерте огыл тыгай серышым Калтаса села гыч Булатовмыт еш налын. Призывникын аважлан тыгай серышым налаш моткоч кумылло. Шке куанышт дене нуно мемнан дене пайлалтыч. Серышыште тыгерак возалтын: «Пагалыме Айгуль Мубаряковна. Эргыдан служитлыме войсковой частьын командованийже эргыда, Буляков Марсель Расульевичым сай ончен куштымыланда кугу таум каласа».

Калтаса села гыч Марсель Булатовым салтак радымыш 2019 ий шыжым, налыныт. 1 №-ан Калтаса кыдалаш школышто тунеммыж годымак Марсель компьютер техникым шымлаш тӱҥалын. Сандене кӱшыл шинчымашым налаш манын, тудо авиационный университетын информатике ден робототехнике факультетышке тунемаш пурен. Салтак службо деч Марсель лӱдын огыл, чын пӧръеҥ садыгак служитлышаш. Сандене ик ий тунеммеке, тудо академический отпускым оформитлен да кызыт Россий армий радамыште кумылын службым намия. Тудо Удмурт Республикыште инженер-сапер полкышто связист лийын служитла.

Ик жап гыч рядовой Булатов Марсель мӧҥгыжӧ пӧртылеш. А тушто тудым уло кумылын аваж ден шӱжарже вучат. Ме тудлан мӧҥгӧ таза-эсен пӧртылаш тыланен кодына.