Профессионал

1 №-ан Калтаса кыдалаш школышто стоматологий кабинет пашам ышташ тӱҥалын

Тиде тунемме ийыште райрӱдысє 1 №-ан кыдалаш школышто тунемше икшыве-влак пӱй корштымо деч огыт лӱд. Кодший март тылзыште кыдалаш школышто стоматологий кабинет пашам ышташ тӱҥалын. Тудым «Взлетай» образовательный проектын «Здоровая улыбка» модульжо почеш илышыш шыҥдарыме.

Тыште пӱйым Р.М. Тагирова эмла. Рамиля Мусаевна Калтаса район рӱдє эмлымверыште 20 ий утла пӱйым эмла. Кызыт тудлан медшӱжар Ольга Васюкова полша. Ольга Бирск оласе медико-фармацевтический колледжыште тунемеш, а кызыт практикым эрта.

– Тачысе кечылан тиде школышто 616 икшыве тунемеш, – ойла Р. М. Тагирова. – Ынде нуно пӱйыштым школыштак эмлен кертыт. Школысо стоматологын услугыж дене 1 №-ан школышто тунемше йоча-влак веле огыл пайдаланен кертыт. Ме график почеш, кушкыжмын да изарнян 9.00 гыч 14.00 шагат марте ыштена. У тунемме ий тӱҥалтыш гыч йоча-влакын пӱйышт шотышто профилактический текшырымашым эртырыме. Кӧлан дыр эмлалташ, кӧлан пӱйым лукташ темлыме. А пӱйым лукташлан, содыки, эмлымверыш каяш логалеш. Тыгак школышто тунемше-влак дене кузе пӱйым эрыкташ, тудым аралаш – профилактике мутланымаш-влакым эртараш шонат.

– Мемнан задачына – тунемше-влакын школым тунем лекме марте пӱйышт таза лийшаш, – ойлат медицине пашаеҥ-влак. – Кажне икшыве идалыклан ик гана стоматолог дене текшырымашым эртышаш.

Школышто кабинетым почмо нерген увер, туныктышо ден тунемше-влакым гына огыл куандарен, тыгак тидлан ача-ава-влак моткоч куаненыт. Вет ынде паша гыч йодаш да йочам эмлымверыш пӱйым эмлаш наҥгаяш ок кӱл, чыла тидым школышто ышташ лиеш. – Тыгай кабинетым почмаш моткоч кӱлешан, – ойлат тунемше-влакын ача-авашт. – Тунеммаш деч кӱрылтде йоча-влак шкеак врач деке миен кертыт, черетыште шинчаш ок кӱл.

Стоматологий кабинет кызытсе жаплан келшен толшо технике дене пойдаралтын. Кабинетым олмыкташ да оборудованийым налашлан 1миллион теҥге оксам кучылтмо. Тудым республике да 50 тӱжем теҥге утлам муницпаль бюджет гыч ойырымо.

Тиде кечылаште «Единая Россия» партийын верысе пєлкажын исполнительный секретарьже Максимова Зоя стоматологий кабинетлан кӱзгӧ ден шагатым пӧлеклен.

Мемнан корр.