Мыланна возат

Кӧкыш ялысе тӱҥалтыш школым ме 1983 ийыште тунем лекна да Ӱлыл Качмаш кыдалаш школыш тунемаш кайышна. Мемнам, комбо ава, комбо игышт-влакым шулдыр йымакше пӱтырал налме семын, туныктышо Евстолия Алексеевна Кугубаева нале. Тудо марий кугыжаныш педагогика институтын физико-математический факультетшым тунем лекмеке, школышко пашашке толын гына ыле. Латик классым тунем лекмеш тудо мемнан класс вуйлатышына лийын.

Евстолия Алексеевнан паша стажше 35 ий. Тудо пашан ветеранже улеш. Чылаже ныл выпуск тунемше-влакым луктын. Визымше выпускым кок ий гына луктын шуктен огыл. Ме тудын икымше выпускшын тунемшыже-влак улына. Школым тунем лекмыланна 30 ий эртен гынат, эшеат тудо мемнан верч тургыжлана, чын корно дене илаш туныктен шога. Школышто тунемаш гына огыл, молыланат тудо туныктен: кушташ, мураш. Концерт номер-влакым шкеак шонен, тӱрлӧ мероприятий- влакым эртарен. Ача-ава погынымашымат кастене эртараш пернен. Вет школышто 26 йоча лийын. Погынымашке чылаже кум ял гыч – Кӧкыш, Ӱлыл Качмаш, Кўшыл Качмаш ялла гыч – погыненыт. Ача-ава-влак тӱрлӧ пашам шуктен иленыт. Евстолия Алексеевнанат ешыже лийын. Суртыштат тӱрлӧ сомылым шукташ кӱлын.

Тиде фотосӱретат вет Евстолия Алексеевнан пашаже. Латикымше классыште тунемше ӱўдыр-влакым чумырен, мемнам Нефтекамск олашке фотосалоныш наҥгайыш. 23 февральлан эрге-влаклан пӧлекым – фотографийым – ышташ шонен пыштен. Чылам чумырен Нефтекамск олашке наҥгаен. Фотосалон гыч лекмеке, тугай чот пургыж тӱҥале. Эсогыл автобус-влакат коштмым чарненыт. А мыланна, мӧҥгеш, ялышке, каяш кӱлын (вет пӧртыштӧ ача-ава-влак вученыт). Тыштат мемнан поро туныктышына лӱдын шоген огыл, нефтяник-влакын вахте машинам кычал муын. Тыге ме Кӧтерем села марте толын шуна. Кӧтерем гыч Кӧкыш да Ӱлыл Качмаш марте йолын толна. Чыланамат пӧрт марте ужатен коден. Тыге мыланна ӱмыреш шарнен илаш фотосӱрет кодо. Тиде фотосӱретлан Евстолия Алексеевналан пеш кугу тау.

Евстолия Алексеевна Альберт Александрович пелашыже дене кум ӱдырым ончен кугемденыт. Чылананат кӱшыл образованийым налыныт. Ирина, эн кугу ӱдырышт, Сургутышто ила да пашам ышта. Олеся ден Алиса ешышт дене Сочи олаште илат.

Евстолия Алексеевна 23 ноябрьыште шкенжын сылне юбилейжым палемда. Ме тудым тиде сылне дате дене саламлена да пеҥгыде тазалыкым, кужу ӱмырым, еш илышыштыда ласкалыкым, порылыкым, тичмаш киндерке гай пиалым тыланена. Тек эре тыгаяк тымалте, ешдам, икшывыда, уныкада-влакым шӱм йӱлен йӧратыше, нунын верч тыршыше лийын кодса. Меат тендам тыгак йӧратена да пагалена.

Ӱлыл Качмаш кыдалаш школым 1990 ийыште тунем лекше выпускник-влак.