Еш поянлык

Чашка ялыште илыше вате-марий Мария Вачуковна ден Арсентий Минилбаевич 50 ий пырля илыме пайремыштым палемденыт

Кунам ятыр жап пырля илыше еш мужырым вашлият, нунын деке пагалымаш шочеш. Тыгай мужыр-влак дене вашлийме годым мый нунылан чӱчкыдын тыгай йодышым пуэм: «Ятыр жап пырля илашлан мом ышташ кӱлеш? Кузе ийла мучко йӧратымашым арален кодаш?»

Нуно чыланат ик семын вашештат: «Икте-весым пагалаш, аклаш, икте-весылан полшен шогаш кӱлеш. Тунам веле чыла неле-йӧсым чытен лекташ лиеш». Куан ден ойгым лош пайлыман, лач тунам веле йӧратымаш илыш мучко шуйнен кертеш. Вате-марий Минилбаевмытымат мый лач тидын нерген йодым.

– Мый тыге шонем: ӱдырым налынат – тугеже иле, – вашештыш Арсентий Минилбаевич. – Мемнан тыге туныктеныт. Ешым чумыренат, тугеже тиде ӱмырешлан.

Тудо, витле ий ончыч, армий радам гыч кум ий служитлен пӧртылшє салтак, ешым чумыраш шонен пыштен. Ончыкылык ватыж дене але палыме лийын огыл. Шочшыжо тудлан пошкудо Кожлаялыште моткоч мотор Мария лӱман ӱдыр уло манын каласен. Шуко шоныде Арсентий Минилбаевич родо-шочшыж-влак дене пырля ӱдыр дене палыме лияш каен.

Кузе тудо шарналтен ойла, кечывалым колхоз паре‰гым погеныт, а кастене, имне дене, ӱдыр налаш каеныт. «Мыланем арням шонаш пуэн», – шыргыжалын каласкала умбакыже Мария Вачуковна.

1970 ий 30 сентябрьыште Калегин ялсоветыште нунын ешыштын шочмым регистрироватленыт. Ялсовет специалист самырык еҥ-влаклан ешым чумырымо нерген свидетельствым вигак пуэн огыл. «Ӱдыр тудлан моткоч самырык койын, – шарналтен ойла Арсентий Минилбаевич. Пырля илаш тӱҥалына але уке манын, шоналтен, очыни». Туге гынат, вате-марий Минилбаевмыт теве ынде 50 ий пырля улыт. Ӱмырышт мучко нуно шочмо Чашка ялыштышт илат. Ончыч Арсентий Минилбаевичын ача-ава суртыштыжо иленыт, вара шке кугу пӧртым чоҥеныт, кызытат тыште илат.

Минилбаевмыт тыгай тукым гыч, нуно нимогай паша дечат лӱдын шоген огытыл. Коктынат колхозышто тыршеныт. Вара суртоза водитель лийын, Амчемучаш школышсо котельныйыште оператор лийын тыршен. Шкеныштын озанлыкышт лийын. Туддеч посна ялыште нигузе ок лий. Тачат, ийготым шотыш налде, Минилбаевмыт ушкалым, шорыкым, тӱрлӧ кайыквусым ончат, тыгак мӱкшым кучат. Рвезе годсо гаяк чыла пашам нуно пырля шуктат.

Шке пайремыштым юбиляр-влак еш коклаште гына палемденыт. А ешышт нунын изи огыл: вич икшыве, латкок уныка, ик кугезе уныка.

Калыкын Икоян улмыж кечын вате-марий Минилбаевмытым кадр да аналитике секторын вуйлатышыже И.И. Тимиряева, Калтаса районысо ЗАГС пӧлкан вуйлатышыже И.В. Валеева саламлаш толыныт. Юбиляр-влаклан Башкортостан вуйлатыше деч саламлыме адрес ден шарнен илаш пєлекым кучыктеныт да нунылан пеҥгыде тазалыкым, еш пиалым да чыла сайым гына тыланен кодыныт.

С. Аркадьева.