Районысо артист-влакын у сеҥымашышт

Ты кечелаште, 20 ноябрьыште, онлайн да оффлай режимыште «Ӱдырсий» регион-влак коклаште эртыше конкурсым иктешленыт.

Ты конкурсышто Башкортостан, Татарстан, Удмуртий республике, Киров область, Москва да Санкт-Петербург олала, тыгак Марий Эл Респубикысе Волжск, Морко, Курыкмарий да Куженер районла гыч 13 ўдыр участвоватлен.

Ӱдыр-влакын «Мый марий ўдыр улам!», «Этномода», тыгак шке регион да районын йўлажым ончыктышо теме почеш видеороликым колтымаште жюри талантым, чаткалыкым, шуко палымым аклен.

Башкортостан Республикым, тыгак мемнан Калтаса районын чапшым Ирина Шаймарданова – райрўдӧ Культура пӧртын кадр-влак шотышто специалист да Ольга Валтиева – Уфа оласе медицине колледжын студенткыже араленыт.

Жюри паша-влакым шымлен лекме деч вара Ирина Шаймардановалан «Шымалче» титулым пуэн, а Ольга Валтиевалан – «Калык йўлам палыше» титул. Тыгак Ольга «Интернет марий ўдыр» титулым сеҥен налын.

Амчемучаш ял гыч Иван Петряев «Лучший сольный исполнитель» номинацийыште сеҥен. Эх, могай молодец тудо улеш!

Иван 12 гыч 16 ноябрь марте эртыше «Такмакфест» республике онлайн-фестивальыште шке мастарлыкшым ончыктен.

«Эрвий» калык куштымаш ансамбль тўрлӧ конкурслаште шкенжын ояр выступленийже да сеҥымашыже дене мемнам куандара. Ты ганат «Эрвий» калык куштымаш ансамбль «Тывырдык» марий куштымаш регион-влак коклаште эртыше фестивальын лауреатше лийын.

Фестиваль 22 гыч 24 октябрь марте дистанционный онлайн режим форматыште эртен да Марий Эл Республикылан 100 теммылан лўмдалтын лийын.

Фестивальыште Марий Эл, Башкортостан, Татарстан, Карелий республике да Киров область гыч коллектив-влак участвоватленыт.

Республике онлайн-фестивальыште йоча да самырык театр-влакат участвоватленыт. Мемнан район гыч икшыве-влакат ӧрдыжеш кодын огытыл. Райрўдӧ Культура пӧртын «Сюрприз» йоча театр-студий самырык театр-влак коклаште III-шо степенян лауреат Диплом дене палемдалтын.

Мемнан яндар йўкан чапле мурызына Кристина Русиева «Яндар йўк – 2020» финн-угор калык муро-влакым мурышо виш конкурсышто 1-ше степенян лауреат лўмым сеҥен налын.

Тудо «Мишкан – культурная столица финно-угорского мира – 2020» проект почеш эртен.

Кузе ме кушно палемденна ыле, эпидобстановко неле улмылан кӧра, ты конкурс дистанционно эртен, колтымо видеозапись-влакым ончен сеҥыше-влакым палемденыт. Конкурсышто Марий Эл, Башкортостан Республике, Киров область, Краснокам, Мишкан, Нуриман, Калтаса район, Янаул, Бирск олала гыч 18 конкурсант участвоватлен.

Мемнан районнан артистше-влакым саламлена да нунылан ончыкыжымат сеҥымашлашке шуаш тыланена.

Мемнан корр.