Визытанлан у планшет дене

Дистанционный тунеммаш – коронавирус пандемийлан кєра мемнан илышыш толын. Шошым школ-влак шке тунемме программыштым онлайн-форматыш писын кусареныт. Мут толмашеш, чыла огыл еш тидлан ямде лийын. Поснак яллаште чыла огыл ача-ава электрон техникым налын кертеш. Шуко икшыван еш-влаклан поснак компьютерым, ноутбукым але планшетым налаш неле. Тунам «Мӧҥгыштӧ тунемаш полшыза» акцийым колтеныт, а тудым «Икоян Россий» илышыш шыҥдарен. Кызыт ты чер шарлымылан кӧра, дистанционно тунемме йодыш угыч нӧлталалтын.

Ты кечылаште «Икоян Россий» партийын Башкортостан региональ пӧлкаже «Мӧҥгыштӧ тунемаш полшыза» акций почеш нужнан илыше шуко икшыван еш гыч 9-ше классыште тунемше-влаклан 200 планшетым пуымо лийын, тышеч кум электрон устройствым Калтаса район гыч еш-влакланат кучыктымо лийын. Еш-влаклан компьютер техникым «Икоян Россий» партийын верысе пӧлкажын исполнительный секретарьже Зоя Валеевна Максимова, образований пӧлкан вуйлатышыже Эльвира Рашитовна Гарипова кучыктеныт.

З.В. Максимова кузе умыландарен, кызытсе жаплан келшен толшо гаджет-влак икшыве-влаклан тунеммаште моткоч кўлешан улыт. Нуным нужнан илыше шуко икшыван ешла гыч индешымше классыште тунемше кум икшыве налын. Тиде Тимур Камалиев, ончыкыжым тудо газоэлектросварщик профессийым шымлынеже да Актыган школ деч вара 27 №-ан Нефтекамскысе колледжыш тунемаш пурынеже. Школышто тудлан эн сай предмет – руш йылме. Энвер да Оксана Камалиевмыт ешыште шым икшыве, нылытше школышто шинчымашым погат.

Тимур Кайбуллин Кугу Агытан ял гыч улеш, 3 №-ан Краснохолмский кыдалаш школышто тунемеш, тудын йӧратыме предметше-влак – физика ден географий, ончыкыжым тудо шочмо селаштак пашам ыштынеже, Нефтекамск олаште 91 №-ан СПТУ-ыш тунемаш пураш да тракторист-машинист профессийым налаш тыланымашыже уло.

Александра Тимиршина, тудат 3 №-ан Краснохолмский кыдалаш школышто тунемеш, музыкаль пашаеҥ лийнеже. Тудо 9-ше класс деч вара Октябрь оласе музыкаль училищыш тунемаш пурынеже. Александра 4 ий Краснохолмский искусство школышто аккордеон классыште тунемын. Александра кушмо ешыште 9 икшыве уло.

С. Аркадьева.