Мемнан вел рвезе-влак тыге служитлат

Алексей Казаков ПВО войскаште сай служитлен мӧҥыжӧ пӧртылын

Мемнан районышто рвезе-влакым армий радамыш колтат, икманаш, черетан призыв умбакыже шуйна. Витле утла самырык еҥ тиде шыжым военнослужащий-влак радамыш ушнен. Калтасамыт уло кумылын шкеныштын порысыштым шуктат. Лач тидын нерген салтак-влакын ача-авашт-влак деке толшо тауштымаш серыш-влак ойлат.

Армий гыч черетан тыгай серышым Кӧтерем села гыч вате-марий Казаковмыт – Михаил Михайлович ден Ирина Витальевна – налыныт. Войсковой частьын командирже, кушто Алексей служитлен, воза:

«Пагалыме Казаков Михаил Михайлович ден Казакова Ирина Витальевна. Тендан эргыда, ефрейтор, Казаков Алексей Михайлович, уло кумылын шкенжын салтак порысшым шукта. Коллективыште пагалымаш дене пайдалана, кеч-могай жапыштат йолташыже-влаклан полшаш ямде улеш.

Тудын вуйлатышыже-влакын мутышт почеш, А.М. Казаков ончылан шындыме задаче-влакым чын шукта, шке шинчымашыже дене йолташыже-влакым палдара.

Ефрейтор Казаков технический обеспечений ротышто службым эртымыж годым пашам йӧратымашыж дене ойыртемалтын, йолташыже-влаклан полышым ончыктен, вуйлатыше-влак велым тудын деке нимогай замечаний лийын огыл.

Пагалыме Казаков Михаил Михайлович ден Казакова Ирина Витальевна. Тыланда тыгай сай эргым ончен куштымыланда кугу таум каласем. Тыланда да тендан ешланда пеҥгыде тазалыкым, еш пиалым, сеҥымашым да пашаштыда чыла сайым гына тыланен кодам.

Войсковой частьын командирже».

Алексей Казаков Кӧтерем кыдалаш школым тунем пытарен. Вара Москвасе энергетический институтын студентше лийын. Икымше курсым тунем лекмыж деч вара, шке ийготан рвезе-влак дене срочный службым эрташ лийын да кодший шыжым тудым армий радамыш налыныт. Алексейым, технический вузышто тунемше студентым, ПВО войскашке служитлаш колтеныт. Тудо технический обеспечений ротышто служитлен.

Ончыкылык гражданский профессийжылан, армийыште налме опыт Алексейлан кӱлеш лиеш. Кызыт тудо армий радам гыч пӧртылын да Москвасе энергетический институтышто умбакыже тунемеш.

Ю. Шамсутдинов.