Профилактике

Кодшо арнян районышто выездной профилактике группа-влак пашам тӱҥалыныт

Нунын тӱҥ цельышт – кузерак йоча-шамыч илат, нунын илыме ешлаште чыла сай мо, иктаж-могай йодыш-влак улыт мо – тергаш. Кызыт, ырыктыме сезон тӱҥалмеке, поснак противопожарный йодыш моткоч пӱсӧ лийын кодеш. Сандене ялсоветлашке ийготыш шудымо икшыве-влакын пашашт шотышто комиссий дене пырля Госпожнадзорын пашаеҥже-влакат рейдышке лектыт.

Пӧрт ден пачерлаште лиймеке, оза-влак дене умыландарымаш пашам намият, кажынылан тул лекме тӱҥ амал тиде тудын дене шекланыде пайдаланымаш манын умылтараш тыршат. Тыгак тӱз огыл электроприбор-влак, тамакым шупшмо годым тудым йӧртыдымаш да молат тул лекме тӱҥ амал лийын кодыт.

Кугу тӱткыш пӧрталште автономный пожар извещатель улмылан ойыралтын.

Тиде проста прибор изиш гына шикш лекме годымат пашам ышташ тӱҥалеш, сандене изи тулым шке вий денат йӧртен сеҥаш лиеш. Кугу йӱкан сигнал дене тудо пӧртыштӧ улшо еҥ-влакым тул пижме нерген шижтара. Мутлан, озаватым плиташте монден кодымо обедше нерген, тамакым шупшо еҥлан йӧртыдымӧ тамакаже нерген. Тольык тиде извещательым чыла огыл еҥ шынден. Шындыме гынат, нуно огыт ыште. Кузе Госпожнадзорын пашаеҥже-влак ойлат, шуко еҥ автономный извещатель кенета, нимогай амал деч посна пашам ышташ тӱҥалмыжлан вуйым шийыт. Тыгай ситуаций годым нуно тудо пудырген манын шонат да йӧртат. А паша извещательыште улшо батарейыште. Шарныза: извещатель чӱчкыдын амал деч посна пашам ышташ тӱҥалын гын, батерей шинчын. Тудым вашталташ гына кӱлеш, приборым йӧршеш йӧртыман огыл..

Рейд группа-влак Тӧлдӧ, Краснохолмский, Амчемучаш ялсоветлаште лийыныт. Чылаже 20 утла ешым тергыме. с. Аркадьева.