Районнан еҥже-влак

Адвокатурын ветеранже А.И. Дончуклан 80 ий темеш

Анатолий Иванович Дончук 1940 ий 30 ноябрьыште Оренбург областьысе Гречевский районысо Урусовка ялыште, МТС пашазын ешыштыже шочын. Изинек пашам ышташ тӱҥалын. Ийготыш шудымо йоча комбайнерын штурвальныйже лийын тыршен. «Степысе корабльын штурманже» ачаже лийын. Комбайн «Сталинец» манылтын, тудым гусеничный трактор шупшын. Тунам тиде паша моткоч неле лийын, шукыжым кид дене ыштыман улмаш. Кыдалаш школымм тунем лекмеке, Дончук Бузулукский чодыра техникумыш тунемаш пурен. Тунем лекме деч вара, распределений почеш, самырык специалистым Калтаса районыш пашашке колтеныт. Тиддеч вара Анатолий Ивановичын илышыже мемнан район дене кылдалтын.

Мемнан районышко толмекыже, самырык специалистлан вигак районышто межколхозный лесхозым организоватлаш шӱденыт. Лач тунам тудын сай организатор, калык, коллективлан ӱшанле улмыжым шижылтын. Свердловск оласе юридический институтым тунем лекмыж деч вара, тушто паша деч кӱрылтде тунемын, Анатолий Иванович ялозанлык управленийыш куснен да тушто юристконсульт лийын тыршаш тӱҥалын. Вара ик жап район прокурорын полышкалышыже лийын ыштен. Тиде паша гыч район вуйлатыше-влак тудым «Родина» колхозыш колтеныт ла колхозын парторгшылан шогалтеныт. Озанлык кугу, тӱрлӧ отрасль гыч шогышо лийын. Анатолий Иванович колхозник-влак ончылан шындыме задачыштым шуктышт манын, изи огыл надырым пыштен. Колхоз районышто эн сай-влак радамыште лийын, шуко шӧрым, шурным, шылым ыштен луктын.

Колхозышто индеш ий тыршымеке, Дончукым эн сай пашаеҥ семын, райком партийын организационный пӧлка вуйлатышыжлан шогалтат. 1991 ий лишемын. Элыштына палыме политический событий-влак лиеденыт. Анатолий Иванович эше кум ий Келтей ялсовет вуйлатыше лийын пашам ыштен. 1995 ий 6 июньышто Республикысе адвокат-влакын коллегийышт тудым адвокат-влакын Калтаса филиалжын вуйлатышыжлан шогалтат. Тиде жапыште Анатолий Иванович сай, опытан да квалификациян шуко кадр-влакым ямдылен.

Тудын шуко воспитанникше Уфаште, Нефтекамскыште да моло олалаште пашам ыштат. Кызыт тудо сулен налме канышыште улеш.

Кушто гына Анатолий Иванович пашам ыштен огыл, могай должностьым гына заниматлен огыл, тудо эре калыклан пайдале лияш, нунын интересыштым аралаш тыршен. Анатолий Иванович гай моткоч тыматле, айдемылан кеч-кунамат полшаш ямде улшо еҥым кычалынат от му, очыни.

Республикысе адвокат-влак коллегийын вуйлатышыже-влак тудын пашажым кӱкшын акленыт. Анатолий Ивановичым «Верность адвокатуре», «Адвокатуре России 150 лет» медаль-влак дене палемденыт. Тыгак Анатолий Ивановичым «Партийная доблесть» медаль дене палемдыме.

Ме, пашам пырля ыштыме йолташыже-влак, тудым уло кумылын юбилейже дене саламлена. Анатолий Ивановичлан пе‰гыде тазалыкым да чыла сайым гына тыланен кодына.

Азат Имашев, республикысе адвокат-влак коллегийын Калтаса филиалжын вуйлатышыже.