Редакцийын почтыж гыч

Тыгерак воза шкенжын йолташ ӱдыржӧ, пошкудыжо Айна Исиметова нерген Васола ял гыч Крлабаева Елена.

Тиде изирак серышым ме тиде кечылаште, Аван кечыже вашеш, налынна. «Калтаса ӱжара» газет редакцийыш мемнан лудшына-влак деч ятыр серыш толеш. Кажныштыже – тӱрлӧ йодыш. Таче ме тыланда ӧрыктарыше ӱдырамаш, кудыжо мемнан воктене ила, каласкалынена.

«Айна Ашыровна – сай, виян ӱдырамаш, ӱшанле йолташ ӱдыр, моткоч сай пошкудо, – воза Елена шкенжын йолташ ӱдыржӧ нерген.

– Ялысе шуко ӱдырамаш гай пашам йӧратыше, чолга, чытыше да пушыкдо кумылан. Тудым мемнан ялыште чыланат – изижат, кугыжат – палат. Моткоч поро, кеч-кунамат полыш кидым шуялташ ямде. Иктаж-мом ургаш, уколым, массажым але прическым ышташ кӱлеш – эре полша, нигунамат огым манын ок каласе. Сандене чыла пошкудыжо тудым пагала.

Тиде поро ӱдырамаш пала, чылажат шкенан деч шога. Чыла вере шумыжлан мый эре ӧрынам. Пӧртыштат чыла сай, ӱстембалне тӱрлӧ да тутло кочкыш. Те тудын ко‰га мелнаж ден киндыжым тамлен ончен огыдал… Йылметым нелат! Эше тудо шуко икшыван ава улеш. Пелашыже Геннадий дене кок ӱдырым да ик эргым ончен кугемдат. Икшывыже-влакымат нуно поро лияш, еҥлан полшаш туныктат. Кугырак Карина ӱдырышт тений 3 №-ан Краснохолмский кыдалаш школым тунем пытарен да Бирск оласе медицине колледжыш тунемаш пурен. Марк ден Аннат сайын тунемыт. Конешне, тыште аван надырже изи огыл. Айна, конешне, пеҥгыдын йодшан, но тыгодымак икшывыже-влакым мокталташ мутым ок чамане.

Эше вате-марий Исиметовмытын оралте тич вольык. Семынем шонем, кузе вара тудын чыла миен лектеш. Эрдене кынелын ушкалым лӱшта, моло вольыкым пукша-йӱкта. А кеҥежым гын паша эшеат шуко – пакча да молат. Тидлан мыняр вий, чытымаш кӱлыт. Туге гынат тиде ӱдырамаш илышлан куанен мошта. Икшыве-шамычат куандаренак шогат. Айна пидаш, тӱрлаш, ургаш, шырча гыч марий орнамент дене кӧржым ышташ йӧрата… Тиддеч посна тудо эше ялын ончыкылыкшо нергенат ойгыра. Ялыште эртарыме тӱрлӧ мероприятийыште участвоватла.

Тиде самырык ӱдырамаш ӱмбак ончет да ужат, нимогай неле паша, неле ял илыш тудын шӱм-чонжым огыт йӱкшемде. Виш шӱм-чонан да поро ӱдырамаш. Аван кечыже вашеш мый йолташ ӱдыремлан тазалыкым, кӧргӧ вийым, чытымашым да чыла сайым гына тыланен кодам. Тек эре самырык да йӧратыме ава лий, Айна».

Почешмут: Мемнан коклаште тыгай сай е‰-влак улмылан шӱм-чон куана. Но молан дыр нуно тӱрлӧ амаллан кӧра ӧрдыжтӧ, ӱмылыштӧ кодыт. Тыгай ынже лий манын, возыза мемнан деке шкендан палымыда, родо-шочшыда, ял калык нерген. Ме уло кумылын тендан серышдам, ойлымашдам, фотосӱрет, историйда-влакым савыктена.

Мемнан электрон адресна: [email protected].