Культура

«Сюрприз» йоча театр-студий (вуйлатыше Эльвира Галимова) республиканский йоча да самырык театр фестивальыште III-шо степенян лауреат лийын

Фестивальым «Культура» национальный проект почеш, республикысе калык творчество рӱдер ден Мустай Карим лӱмеш национальный самырык театр йоча да самырык театр-влаклан полшаш манын, организоватленыт.

Коронавирус пандемийлан кӧра фестиваль онлайн-формат дене эртен. Но тиде мемнан самырык актерна-влаклан шкеныштым ончыкташ мешаен огыл. – Мыланна ик ий веле, – ойла Эльвира Галимова. – Туге гынат, мемнан сеҥымашна шагал огыл. Моло район ден олалаште йоча театр-влакын стажышт кугу.

Конешне, тыште вуйлатышынат, актер-влакынат, нунын коклаште моткоч талантан-влак улыт, ача-ава-влакынат надырышт кугу. Мутлан, Элина Матвеевам налаш. Тудо мура, кушта, театрыште модеш. Шукерте огыл Элина «STAR FEST» Тӱнямбал конкурс-фестивальыште шке ийготан икшыве-влак коклаште I-ше степенян лауреат лӱмым сеҥен налын.

Тыгак «Сюрприз» йоча театр-студий «Перезвон колокольчиков» йоча театральный коллектив-влак коклаште республиканский онлайн-фестивальын дипломантше лийын. – Мемнан йочана-влак талантан улыт, - каласкала умбакыже театр вуйлатыше. – Кажне йочан шочмыж годымак могай-гынат талантше уло. Лач ача-ава-влак тидым жапыштыже гына шижын налшаш улыт. Икшывыда-влакын актер лияш кумылышт уло гын, кондыза мемнан деке.

Йоча коллективыште самырык актер-влак спектакльым гына огыт шынде, тыгак сценыште мутланаш тунемыт да шуко молыланат.

А таче Эльвира Галимова, кӧ ончыкыжым актер але режиссер факультетыш тунемаш пураш шона, подготовительный практический занятий-влакым эрташ темла. Тидлан районысо Культура пӧрт пелен Любительский театрыш йодын мийыман але 89603826659 номер дене йыҥгыртыман.