Пайрем

Калтаса селаште У ий елкам шогалтеныт

Елка районысо Культура пӧрт площадьыште шога. Пушеҥге тичмаш огыл, а тудын укшыжо-влакым, тыште пӱнчӧ укш-влакым, кӱртньӧ каркасыш пижыктыме. Райрӱдыштӧ елкам кокымшо ий тыгай йӧн дене шындат. Калыкын да унамытын шонымышт почеш, тыгай елка моло ийласе деч сылнырак коеш. – У ий елкам Константин Сатаевын бригадыже поген, тудым «Калтаса шокшо сеть» МУП субподрядчик семын налын, – каласкала Калтаса ялсовет администраций вуйлатыше Руслан Кутлубаев. – Нуно У ий елка воктене ий гоч олам йомакысе персонаж-влак дене чоҥаш тӱҥалыт. Опытшо тидын шотышто бригадын ситышын уло. Пытартыш ийлаште лач нуно райрӱдӧ площадьым У ий вашеш сӧрастареныт. Елкашке да воктенысе территорийлашке гирлянде-влакым «Нур» ООО-н электрикше-влак пижыктат. Сӧрал У ий елкат, ий олат кугыеҥ-влакынат кумылыштым нӧлталеш, а йоча-шамыч нерген ойлыманат огыл, нунын куанлан мучаш уке. Вет тыште чылажат уло – чапле иллюминаций, йомак фигуро-влак, курык гыч мунчалташ лиеш. Пу гыч ыштыме кок курык кызыт РДК площадьыште шога.

Йоча да тыгак кугыеҥ-влакланат райрӱдыштӧ, Краснохолмский, Кӧтерем селалаште, Ӱлыл Качмаш ялыште ий катокым ыштыме. Калтасаште конькимат пуат, ик шагатше 50 теҥге веле.

Площадьыште мотор елкам ончымаш, ий курык гыч да ий катокышто мунчалтымаш тений йоча-шамычлан ик эн тӱҥ куан лийын кодыт. Йӱштӧ Кугыза да Лумӱдыр дене хороводышто тений елка йыр огыт пӧрд, очыни. У ий утренник-влак школлаштат, йочасадлаштат, культура учрежденийлаштат тений огыт эртаралт. Кызыт тиде йодмаш гына, но вашке, очыни, чыла официально лиеш да республике Правительстве ден муниципалитет-влак администраций кӱлеш пунчалым луктыт. Июньышто ме школ выпускник-влак верч ойгырышна, вет пандемийлан кӧра нуно выпускной касым эртарен кертын огытыл. Ынде чыла йочам веле чаманаш кодеш.

Но туге гынат, У ий кумыл лийже манын, мӧҥгыштӧ йоча-шамычлан пайремым садак эртараш кӱлеш. Сандене ача-ава-влаклан сай фантазийым гына тыленам.

Ю. Шамсутдинов.