Мемнан порысна – мондаш огыл

Тиде жапыште районышто шагал огыл мероприятий эртаралтын: онлайн-конкурс, фестиваль, акций-влак. Тиде чылажат калык 75 ий ожно мо лийымым шарнен илыже да ынже мондо манын ышталтеш. Районысо культура пашаеҥ-влак кугу пашам шуктеныт. Мутлан, Кучаш ял библиотекын библиотекарьже Инесса Минуллина эше идалык тӱҥалтыштак «Память и поклон поколений» шарнымаш стендым сӧрастараш тӱҥалын да Кучаш ял библиотекын социаль страницылаштыже «Воспоминания ветеранов тыла, детей войны» акцийым увертарен. Шке пашаж нерген каласкалышыжла, Инесса Хамитовна районышто илыше чыла калыкым Кугу Отечественный сарыште кредалше да тушто колышо, тыгак илыше ветеран-влакым шарнен илаш ӱжеш.

– Шучко да шуко вӱрым йоктарыше сар нерген ме лач каласкалымаш-влак гоч гына палена, – ойла тудо. – Кузе мый сарым ярымлем? Йырваш шаланыше пӧрт, кадыргылше чодыра, тулык икшыве-влак, ава, вате, йоча-влакын шортмышт…Лӱдыкшӧ…Сеҥымаш верч моткоч шергын тӱлаш логалын. Сандене ме тудым шарнен илышаш, шӱм-чоныштына аралышаш улына. Кучаш мландыште илыше калыкат Сеҥымашке изи огыл надырым пыштен.

Палемдаш кӱлеш, Кучаш ял сар жап годым кузерак илымыжым шарналташ манын, Инесса Хамитовна поян материалым поген. Конешне, тыште тудлан кугу полышым ял калык ончыктен. Шукыжо тудлан фотосӱрет, родо-шочшыштын шарнымашышт дене пайлалтыныт – шке ковашт, кочашт, авашт, ачашт нерген каласкаленыт. – Ме чыланат молодец улына, – куан дене ойла И. Минуллина. – Группышко посна еш, сар жапысе ял илыш, коча ден кова, ача ден ава-влакын илышышт нерген возеныт. Тиде ялнан, районнан, республикынан историйже.

Таче вӱдышӧ библиотекарь, кӧ тудлан шарнымаш стендым сӧрастараш полшен, кугу таум каласа. Чаманаш веле кодеш, таче Кучаш ялыште илыше сарын ик ветеранжат кодын огыл. – Шучко сар мемнан калыклан кугу ойгым конден, – ойла Инесса Минуллина. – Тиде сарыште мемнан шуко землякна колен. Самырык рвезе ден ӱдыр-влак фронтыш каеныт. Кӧ тылыште кодын, эр гыч пычкемыш кас марте пашам ыштеныт, салтак-влаклан шокшо носки ден пижым пидыныт. Шуко кочо шинчавӱдым конден мемнан ялышке сар. Кӧн дыр ачаже, кӧн дыр пелашыже, кӧн дыр эргыже сар пасушто ӱмырешлан кодын.

Инесса Хамитовнан пашаже арам лийын огыл. Кеч-мыняр ий эрта гынат, район калык нигунамат нунын лӱмыштым ок мондо. Мыланна тыныс илышым пӧлеклыше-влакын лӱмыштым курым мучко шарнен илаш тӱҥалыт. Почешмут: Инесса Хамитовна Минуллина шке пашаж дене тыгак «Великая война. Великая Победа» библиотеке проект-влакын Всероссийский кокнурсын «Работы, выполненные в сельских библиотеках» номинацийыштыже участвоватлен. Тышке элнан 74 регионжо гыч 924 пашам колтымо лийын. Икмыняр мутым «Память и поклон поколений» шарнымаш стенд нерген каласыме шуэш.

Тудын кӱшыл ужашыже сарыште колышо Кугу Отечественный сарын участникше-влаклан лӱмдалтын. Пурла велне – Кучаш да Татар Пекшык ялла гыч Кугу Отечественный сарын участникше-влак, нуно сеҥымаш дене пӧртылыныт. Тиде ужаш тыгак манылтеш – «Они вернулись с Победой». Выставкын шола могырыштыжо тылын геройжо, сар жапысе икшыве-влакын фотосӱретышт. Тудо «Мы верили и ждали» манылтеш. А ӱлнӧ – Курымашлык тул да «Бессмертный книга полк», тудо кум книга гыч шога: «Память», «Они вернулись с Победой», «Герои тыла». Пурла велне Сеҥымаш парадыш лекше салтак да флаг дене военный техникек, а шолаште – предмет-влак, кудышт сар жапыште салтак-влаклан эн кӱлешан лийыныт.

О. Айгильдина.