Пайдале каҥаш

Микроволновкышто кочкышым, мутлан, пиццым, ырыкташ кӱлмӧ годым тудо утыж дене ынже кошко да сукара гай ынже лий манын, воктекше стакан вӱдым шындыман.

Пӱкш – моткоч пайдале да витаминлан поян кочкыш. Но тудым арален моштыман. Пӧлемысе температурышто кужу жап кучаш гын, кочырак таман лиеш. Тыгай деч утлаш манын, пӱкшым сайын петыралтше контейнерыш пыштыман да йӱштӧ верыш шындыман. Тыге пайдале вещестьва аралалт кодеш, тамжат свежа гаяк кодеш.

Кочкышым ямдылыме годым, мутлан, колым кучылтмо деч вара, кид кужу жап ӱпшалтеш. Пушым пытараш манын, кидыш содым але лимон сокым йыгыман, вара леве вӱд дене мушман. Пуш пытышаш.

Ужар йӧр шудо лывыжгаш тӱҥалын гын, вӱдан стаканеш вераҥдыман. Тушко изишак уксусым ешарыман.

Тыгеат ышташ лиеш. Ужар йӧр шудым изи ий формылашке пыштыман, тушко вӱдым але оливке ӱйым ешарыман да морозильникыш вераҥдыман. Кӱлеш лийме годым тудым лукташ да кучылташ мотокоч йӧнан.