Подписке – 2021

Подписке кампаний мучашке лишемеш. Мемнан пагалыме лудшына-влак газет да журнал деч посна ынышт код манын, Россий почто декабрь тӱҥалтыште Всероссийский подписке декадым эртара. Тидыже ынде шукертак поро йӱлашке пурен. Тиде гана декадын кокымшо этапше – 3 гыч 13 декабрь марте эрта. Тиде кечылаште кажне тыланыше еҥ ӱлыш ак дене йӧратыме газетышт ден журнал-влаклан сералт кертыт.

Декаде эртыме жапыште ме почтальон-влак дене вашлияш да нунын пашашт нерген мутланаш лийна. Почта пашаеҥ-влак чыла нелылыкым шотыш налде (изи пашадар, коронавирус да молат) шке пашаштым кумылын шукташ тыршат.

Мутлан, почтальонка Марина Богданова Павасола ден Васола яллам обслуживатла. Почтым налаш тудлан кажне кечын Шоръял почто пӧлкашке толаш кӱлеш. А тудыжо Васола ял деч 9-10 километр тораште верланен. Ончыч, совет жапыште, почтальон-влалкан имньым пуэныт. Тидын нерген пеш сайын Тошто Оръямучаш гыч почтальон Савитова Марина шарна. Тудо тиде жапыштат почтальон лийын пашам ыштен. А кызыт гын тудлан Тӧлдӧ почта пӧлка марте йолын каяш кӱлеш. Оръямучаш гыч Тӧлдӧ марте, Васола гыч Шоръял гаяк лиеш. Савитова Марина почтальон лийын 35-40 ий наре тырша.

Теве тыгай улыт ялысе почтальон-влак, икманаш, «имньымат кудалмаште чарен шогалтат да йӱлышӧ пӧртышкат пурат».

Келтей почта пӧлка

Келтей почта пӧлкаште вуйлатыше-влак чӱчкыдын вашталтыт. Лийын тугай жапат, кунам Келтей почта пӧлкашке Нефтекамск оласе почтамт гыч пашаеҥым колтеныт.

Елена Валерьевна Вахитовам почта пӧлка вуйлатышылан шогалтымеке, чылажат шке верышкыже шинчын, манаш лиеш. Ынде мыланнат, редакций пашаеҥ-влакланат, куштылгырак лие. Уло кӧ дене подписке шотышто кылым кучаш. Келтей ялысе почто пºлка пºлем кугу огыл. Туге гынат тыште чылажат шке верыштыже верланен – сату, газет ден журнал-влакат.

– Келтейыште лудаш йӧратыше калык ила, – ойла Елена Валерьевна. – Ноябрьыште, кунам икымше декадым увертарыме ыле, ме почтальон-влак Чапаева Эльвира (Келтей ял), Жижина Валерия (Графск ял) пашанам сай шуктышна. Декабрыьште гын эше шукырак газет ден журнал-влакым серыкташ шонена. Калык мемнам поддержатла, докан.

Эше Елена Валерьевна дене мутланымаш гыч мый пален нальым, Графск гыч почтальон Жижина Валерия Дмитриевна ялсоветын депутатше да ялын старостаже улеш. Теве тыге тудлан ял калык ӱшана. Графск ялысе чыла пӧртыштат район газетым лудаш тӱҥалыт манын, ынде меат ӱшанен кодына.

Краснохолмский почта пӧлка

Кунам ме Краснохолмский почтальон-влак деке пуралт лекна, нунын погынымаш ыле. Нунын деке районысо ӱдырамаш-влакын каҥашыштым вуйлатышыже З.В. Максимова Аван кечыж дене саламлаш толын улмаш. Яра кид дене толын огыл, а пӧлекым конден. Ӱдырамаш-влаклан пеледыш аршаш ден кугу олма когыльым кучыктен.

Ме нунын нерген мом каласен кертына? Тиде почта пӧлкаште моткоч сай коллектив пашам ышта. Икте-весыштлан кеч-кунамат полшаш ямде улыт. Паша гыч кайыше тыште уке. Почта пӧлкам Байдуганова Альбина Михайловна вуйлата. Рӱдӧ изданий-влак почеш нуно планым теменыт. Республикысе изданий-влак почешат результатышт начар огыл.

Всероссийский декаде эртыме жапыште нуно калыкым шуко газет ден журналлан серыкташ шонат. Пагалыме холммыт, ӱжса шкендан деке почтальон-влакым. Ида лӱд, пандемий условийыште пашам кузе ышташ, нуно сай палат. Чыланат маске, перчатке дене коштыт. Кажне кечын тергымашым эртат.

Калмаш почта пӧлка

Калмаш почта пӧлкам Афансьева Людмила Владимировна вуйлата. Почтальон лийын тыште Николаева Роза Вадуковна тырша. Р.В. Николаевна совет жапыштат почтальон лийын ыштен. – Тунам, – каласкала тудо, – кажне еш 5-7 газет ден журналым серыктен. Нуным шалатен ноен пытенам. Подискылан оксам колхозын кассыж гыч кучен коденыт. Оҥай да сылне жап-влак ыльыч. Калык газет ден журнал-влакым лудын. Илышат тунам весе лийын.

Пытартыш жапыште нунын паша принципышт тыгай: кечылан 5-10 подписчик, тыге почтальон шкенжын планжым эркын тема. – Шукыжо, кӧ газетым эре лудын шога, нуно подпискым ноябрьыштак ыштеныт, – каласкала Людмила Владимировна. – Ме декабрь тылзалан спискым ыштенна, нунын дене пашам ышташ тӱҥалына. Нунын чыла миен лектеш манын, меат ӱшанен кодына.

Кӧтерем почта пӧлка

Ятыр ий тиде почта пӧлкам Ощепкова Нина Леонидовна вуйлатен. Тиде почта пӧлка шке показательже дене Нефтекамск почтамтын почта пӧлкаже-влак кокла гыч эре икымше да кокымшо верым налын шоген. Кызыт тиде почта пӧлкам самырык ӱдырамаш Оксана вуйлата. Но Нина Леонидовна йӧратыме пашажым шолен огыл, почтальон лийын ышта.

Кунам ме почта пӧлка пӧлемыш пурышна, нуно мемнан газетым лудыт ыле: ала увертарымашым ала район администрацийын у вуйлатышыжын илыш корныжым шымлат. – Тӱҥ шотышто школ, йочасад, моло учреждений пашае‰-влак периодике изданий-влаклан сералтыныт, – каласкала Нина Леонидовна. – Молан дыр нефтяникымыт, АРНУ пашаеҥ-влак сералташ огыт вашке. Чылажат интернет кертеш. Тушто мо гына уке. Лавыра, шоя да молымат тушто муаш лиеш. Тольык вот газетыште гына чыным возат – тыгерак шотла почта службын ветеранже Нина Леонидовна.

В. Акиев.