Айдеме чонын конструкторжо-влак

Таче ме тыланда нине туныктышо-влак нерген каласкалынена.

3 №-ан Краснохолмский кыдалаш школышто тыште ончыч пашам ыштыше туныктышо-влакым огыт мондо, шарнен илат. Тидыжым, очыни, кажне школышто ыштат, вет историйым мондаш ок лий.

Историйым туныктышо-влак кокла гыч ме Анель Александровна Панфиловам шарнена.

Тудо школым, коллективым, шке пашажым моткоч йӧратен да шкенжын шуко жапшым йӧратыме пашажлан пуэн. Тудо тыгай принцип почеш илен: яра жапыште – сай книгам лудман, отпуск жапыште – путешествийыш коштман.

Арамлан огыл, очыни, ойлат, туныктышо – тиде артист, кудыжо кажне кечын сценышке лектеш да шке палымыжым, моштымыжым тунемше-влаклан пуа. Тиде мут-влак Фалин Владимир Петровичланат келшен толыт. Тудо тошто фотосӱрет-влакым ончаш йӧрата, нуно тудлан эртыше ий-влакым шарныктарат, шеҥгеке ончалаш таратат. Тудын аклаш лийдыме, уло вийжым пашашке пыштымыжым эн тӱҥ айдеме качествылан шотлаш лиеш. Кӧ тудын дене тунемын, моткоч пиалан лийын.

Тыгак Зинатуллина Елена Радиковнам палемдыме шуэш. Тудо туныктымо процессышке творческий миен. Тудо кажне тунемшым, тудын индивидуальный йӧнжӧ ден ойыртемжым шижын моштен. Йоча чыла велымат шуаралтше манын, чыла ышташ тыршен. Тунемше-влакын илышышт оҥай да поян лийже манын, чыла ыштен. Чӱчкыдын нунын дене пырля театрыш, музейыш коштын. Тунемше-влакым воспитатлыме да нунын уш-акылыштым пойдарыме шотышто шӱдӧ дене тӱрлӧ мероприятий эртаралтын веле огыл, тыгак тыште кажне тунемше участвоватлен. Тудын тунемшыже-влак художественный самодеятельностьышто, концертлаште участвоватленыт. Кунам йоча-влак мурат, куштат, почеламутым лудыт, нуно шкеныштын кӱлешлыкыштым шижыт.

Нуруллина Хадича Магаруфовна дене вашлиймаш тудын кӧргӧ тӱняжым пален налаш сай йӧным ыштыш.

Конешне, тиде оҥай да виян туныктышо. Хадича Магаруфовна кажнылан неле жапыште поро мутым муэш, полыш кидым шуялта. Тудын деке шуко еҥ сай каҥашым йодын мия. Тудын воктене тыматле да шокшо. Туныктымаш тудын призванийже.

Туныктымо пашан икымше кечыж гычак Мухтарова Екатерина Александровна пален, урокышто сырыме да вурсымо олмеш воштыл колтет гын, чыла неле-йӧсым сеҥаш лиеш. Сандене тунемше-влак дене тудын кылже эре сай лийын. Нуно икте-весыштым ик мут гычак умыленыт. Туныктышо сай садовник семын, тунемше-влакын шӱмыштышт порылыкым куштышаш, вет тудо айдеме чонын конструкторжо улеш.

Зиялтдинова Айгуль Даниловна мемнан школышто пашам ыштышыла, туныктымаш процессышке творческий мияш тыршен. Тудат тунемшым шижын, тудын посна ойыртемжым ужын моштен. Йоча-влакым поро пашам ышташ таратен.

Шке профессийжым ойырен налшыла, Миргазизова Айсылу Вагизовна тудлан ӱмыржӧ мучко ӱшанле лийын кодын. Тудо тунемше-влакым Шочмо элым йӧраташ, тудын дене кугешнаш таратен шога.
Бирскысе социально-педагогический академийын историй факультетышкыже тунемаш пурышыжла, Цедилкина Инна Валереьевна туныктышын пашаже куштылго огыл, пален. Тиде чынжымак тыге. Тудо кугу тӱткылыкым, палымашым да пытыдыме энергийым йодеш. Шуко палыше, кӱкшӧ порысан, кугу да шижын моштышо, поро да чытыше шӱм-чонан туныктышо веле тиде неле пашам шуктен кертеш. Инна Валерьевна кажне тунемшын чоныштыжо кечыйол ден шӱдырым чӱктен кертеш.

Туныктышо шкенжым шке тунемшыже-влак дене шуя, нунылан шинчымашым, илыш опытым пуа, школ дечат варат нунын илышыштым текшыра. Эл мучко шаланен пытыше тунемше-влакат шке туныктышышт-влакым огыт мондо, нуным шарнен илат.

Тиде кугу награде огыл мо! Лач тидлан верч йоча-влакым туныкташ да илаш кӱлеш. Тиде кугу пиал!

3 №-ан Краснохолмский КШ-ын коллективше.