Калтаса ужара
-3 °С
Пылан
Все новости
Новости
1 Ӱярня 2021, 18:25

Коронавирус деч прививке. Ышташ але уке?

Тидын нерген мемнан лудшына-влак мом шонат да специалист-влак мом темлат вара?Коронавирус деч вакцинаций тӱня мучко кая. Икымше февраль гыч тудым мемнан районыштат ышташ тӱҥалыныт.

Тунам 40 еҥ прививкым ыштен. Калтаса эмлымверын официальный данныйже почеш, вакцинаций тӱҥалме кече гыч прививкым мемнан районышто 445 еҥ ыштен. Еҥ-влак прививкым ышташ сералтыт, но черет уке. Кузе прививочный кабинетын медшӱжарже Наталья Мустафина ойла, калык вакцине пурымо семын прививкым ышта. Эртыше арня мучаште гына 120 дозым конденыт.
Кажне еҥ прививкым ыштен кертеш. Но молан дыр, тиде йӧн дене ме огына пайдалане. Мо вара мемнам чара? Вакцинаций нерген мемнан лудшына-влак мом шонат вара да прививкым ышташ кӧнат мо? А можыч, ыштенытат?.. Ме район калыклан йодышым пуышна да теве ваштареш мом колна:
«Кызыт прививкым ышташ ом шоно, ончалам, прививкым ыштыше-влакын реакцийыштым». »Можыч, мый чын омыл, туге гынат, прививкым ышташ ом шоно». «Мый коронавирус дене черланенам. Сандене мыйын иммунитетем уло манын шонем». «Ом ыште да ышташат ом шоно». «Мый тудым ышташ лӱдам». «Прививкым ыштем. Но кызыт, ял гыч лекташ пагыт уке, то игече мешая, то эше иктаж-мо». «Ышташ але уке, кызыт ом пале».
«Мый прививкым ыштенам. Вигак, нимом шоныде ыштышым. Сералтым, вакцине пурымым вучышым. Икымше кок кечын лушкыдылыкым шижым, а тыге чыла сай».
Вашмут-влак гыч коеш, кӧ ышташ шона, кє уке. Туге гынат, прививкым ышташ шонышо-влак, содыки, шукырак улыт. Молан вара шукышт вакцийнаций деч лӱдыт? Тудын последствийже уло але уке?
Вакцинаций нерген мыланна Калтаса эмлымверын поликлинике вуйлатышыже Валерия Кулькова каласкалыш.
– Коронавирус дене черланаш але вакциным ышташ? Таче тиде моткоч пӱсӧ йодыш. Сандене тиде ситуацийым тӱткынрак ончалына. Ынде теве ик ий тӱняште коронавирус пандемий озалана. Кажне кечын тудын дене черланыше-влак шукемыт. Официальный данный почеш, мемнан республикыште гына 28 тӱжем утла еҥ тиде чер дене черланен. Инфекций симптоман але симптом деч посна улшо черле еҥ деч кусна. Инкубаций жап 1-14 кече шуйна, кокла шотышто 7 кече. Коронавирус инфекцийын палыже-влак ОРВИ але грипп гаяк: чытырыкта, кокырыкта, логар коршта, лушкыдылык шижылтеш, там ден нерӱпш йомеш. Неле случай-влак годым, кунам вирусан пневмоний вияҥеш, лач ИВЛ гына полшен кертеш. Шагал годым чер нимогай симптом деч посна эрта. Сандене, чер куштылгын да нимогай последствий деч посна эртыже манын, мемнан ученый-влак Govid-19 деч 19 Гам-Ковид-Вак (СпутникV) вакциным шонен луктыныт. Официально тудым 2020 ий 11 августышто Россий здравоохранений министерствыште регистрироватленыт. Тӱняште тиде коронавирус деч икымше вакцине. Мемнан элысе вакцине йот элласе-влак деч нимо денат ок ойыртемалт. Вет тӱняште тудым ямдылашлан тӱҥ типым: нуклеиновый кислота ден белок, вирус-влак негызан вирусан векторный вакциным кучылтыт. Тудын тӱҥ компонентше-влак нерген каласкалаш гын, вакцинын тӱҥ негызшылан аденовирусный векторым налме, лач тудо ОРВИ-м шочыкта. Икманаш, вектор тиде – вирус, тудын шарлымаш генже уке да тудо вес вирус гыч генетический материалым клеткышке транспортироватла. Лач тудын ваштареш вакциным ыштыме. Вектор организмлан нимынярат лӱдыкшӧ огыл.
Вакцинаций кок этап гыч шога. Икымше прививке – ген дене вектор коронавирус кодан S-белок дене, клеткыш шыҥа. Организм S-белокым синтезироватла, тыге иммунитет пеҥгыдемеш. Кокымшо прививке, икымше прививке деч 21 кече эртымеке, ышталтеш.
Мучаште теве мом каласыме шуэш – прививке деч лӱдаш ок кӱл. Тудо тендам да тендан лишыл еҥда-влакым коронавирус инфекций деч арала. Конешне, нимогай противопоказаний уке гын, тудым ыштыман.
Ушештарена, кє коронавирус инфекций деч вакцинацийым ышташ шона гын, тугеже ГОСУСЛУГИ портал, участкысе терапевт але Калтаса эмлымверын регистратурышкыжо 4-00-36 номер дене йыҥгыртен, сералтын кертыда.
О. Айгильдина.
Почешмут. Ме тыгак кӧ Govid-19 деч прививкыми ыштен, нунын шонымашыштым палаш лийна.
Кира Бикмурзина, Калтаса эмлымверын медшўжарже, Калтаса села:
– Мый вакцинацийым ышташ але уке шуко шонышым. Шуко палымем, пашам пырля ыштыме йолташем-влак коронавирус дене черланеныт. Нунын коклаште колышо-влакат лийыныт. Сентябрьыште мый грипп деч прививкым ыштышым. Теве ынде коронавирус деч ышташ лийым. Конешне, кеч медпашаеҥ улам гынат, лӱдынам. Пӱтынек мыйым прививочный кабинетын медшўжарже Наталья Гавриловна лыпландарыш. Чынжым гын, мыйын черланымем ок шу. Вашке кокымшо прививкым ыштем.
Анисия Ахамдиева, пенсионерке, Павасола ял: – Ме пелашем дене коктын кажне ийын грипп деч прививкым ыштена. Коронавирус инфекций деч прививке шотыштат шонымаш лийын огыл. Фельдшер деч кунам прививкым ышташ лийме нерген пален нална. Икымше прививкым ыштышна. Прививкым ыштыме деч ончыч мемнан тазалыкнам тергышт. Толна да прививкым ыштыктышна, нимогай последствий уке ыле. Чыла сай. Вашке кокымшо прививкым ыштена.
Анастасия Иванова, Калтаса эмлымверын участковый терапевтше, Калтаса села: – Кӧ, Govid-19 инфекций дене черланен огыл, прививкым ыштат гын, сайрак ыле. Тиде вакцине дене нуно антителам налыт. Прививкым ыштымеке, инфекций дене черланен кертме лӱдыкшӧ шагалрак лиеш. Мый шкежат прививкым, кок этапшымат, ыштенам. Прививке деч вара нимогай осложнений лийын огыл, кеч мый тиде инфекций дене 2020 ий кеҥежымак черланенам ыле. Вакцинаций жапыште мыйын антитела-влак лийыныт але уке, каласен ом керт. Туге гынат, мый шкемын пациентем-влаклан примерым ончыкташ лийым.