Калтаса ужара
+29 °С
Пылан
Все новости
Новости
1 Ӱярня 2021, 16:55

Мемнан календарьна

МартСалам, шошо!Кече шокшын ырыкта,Левын шошо шӱлалта.Тӱвыт шыгыр чашкерла гычПамаш-влак, шоҥешталын,Тєрштыл-шолын, румбыкалтын,Ий-влакым пудырталын,Йогат талын, мӱгыралын.Корем еда вӱд йога,«Толын шошо!» кычкыра.С.Г. Чавайн.

Талукын нерым чывыштылше чатлама йӱштӧ пагытшын – ош телын кӱчык ӱмыржӧ мучашыш шуо. Эше тудо кӱжгӧ ош кӱрыкшым кудашаш тӱҥалын огыл: туге гынат кече ынде утларак шыргыжал онча да тура кечывал жапыште пӧртвуй ӱмбач яндар вӱд чӱчалтмымат ужаш лиеш: пуйто теле ойган шинчавӱд дене шорташ ямдылалтеш.
Лум мландылан йӱашыже шуко вӱдым сӱра, тыгеже, шурнат сай шочшаш.
Телым пылан игече левырак, а ояр игече поснак йӱштӧ лиеш ыле гын, ынде кечан кечыште сайынак ырыкта. Садланак яллаште шорык паран-влакын йӱкышт, презе-влакын ломыжмышт, агытан-влакын мурымышт да южо оралтыште мунчен волышо чыве-влакын кыдетлымышт шергылтеш, вет нунат кечан оралтышке лектыныт да шокшемаш тӱҥалше игечым куанен саламлат.
Теле эртымым да шошо лишеммым эше теве весат палдара: суртла воктене илыше пӧрткайык-влак, тӧрза янышлык ӱмбак кӱзен шинчын, шке кайык йылмышт дене утларак веселан мутланат – йӱштӧ годымсо семын пуныштым огыт овартыл. А шем шовычан, яндар ош шӱрган да нарынчалге-ужар пинчакан киса-влак пӧрт воктенысе да сад пушеҥге укшлаште чулымын тӧрштылын йӱкланат. Шонанпыл гай вургеман кӧгӧрчен-влакат куанен гӱрлат.
Тылзе кыдалешак «уна-влак» коедаш тӱҥалыт. Эн ончыч шемкорак да ча‰а-влак, а вара, тылзе мучашеш, мурызо шырчык да йорга турий-влак толын шуыт.
Чодыраште пушеҥге-влакын укшлашт шыжымсе гай чара улыт – лумйолва деч эрненыт. Кєргашан пушеҥгылам шиштын утларак чот перкалымыже, купшӱльын чӱчкыдынрак варгыжмыже да ола-вула шогертен-влакын воштыл-воштыл колтымышт гына талукысо кок пагытын вашлиймыштым шижтарат. Тыгак теле жапыште посна-посна илыше мераҥ, ур да моло кайыквусо ден янлык икте-весыштым кычал кудалыштыт. Моланже пале, вет нуно, тӱҥ шотышто, шке тукымыштым шарашлан шошым ямдылалтыт, а кеҥежым игыштым ончен куштат. Тыге пӱртӱс кӱшта!
Семынже телат куандарыш, а ынде тудлан чеверласаш жап шуын. Мо вара, сай унат шке жапыштыже родыж деч кайышаш. Тугеже, чеверын, тошто теле, салам, шошо!