Мишкан селаште финн-угор калыкын исконно-калык творчествын II-шо региональ фестивальже эртен. Тудо «Ӱярня – 2021» марий пайремлан лӱмдалтын лийын

Тений ты пайремыш Благовещенск, Бирск ола, Илиш, Калтаса, Нуриман, Шаран, Мишкан районла гыч 11 творческий коллектив погынен.

Шуматкечын райрӱдӧ Культура пӧрт ончылно калык шуко погынен. Ояр, мотор тувыр-влакым чиен коллектив-влак погынаш тӱҥалыныт. Тальянке дене шоктеныт, марий тӱмыр йӱк шергылтын – тыге мишканмыт уна-влакым вашлийын. «Ӱярня» пайремын толшо калыкым Мишкан район МР администрацийын вуйлатышыже П. Трапезников, Башкортостан Республикын калык келшымаш пӧртын вуйлатышыже И. Султанмуратов, «Эрвел Марий» региональ марий калык-культура автономийын вуйлатышыже В. Ялаев шокшын саламленыт.

Фестивальыш толшо чыла 11 команде творческий номерым, калык модмашым, ӱстел сийым ямдыленыт. Пайрем пеш сай эртен. Изижат, кугужат тӱрлӧ таҥасымашлаште шке вийжым, мастарлыкшым, чолгалыкшым ончыктен.

Творческий коллектив-влакын шке концерт номерыштым ончыктымышт годым, нигӧ верыштыже шоген кертын огыл, чыланат кушташ лектыныт. Райрӱдыштӧ марий калыкын гына огыл, чылаштынат ик эн йӧратыме куштымашым – кандырам пунен куштеныт. А ӱстелыште могай гына сий лийын огыл. Тамле деч тамле, чевер мелнам кажныше тамлен ончен кертын. Тидыже мо нерген ойла!? Мишкан кундемын Ӱярня толын. Пайрем шӱлыш озаланен. Икманаш пайрем оҥайын да чаплын лийын.

Жюри творческий коллектив-влакым аклыме годым моло мурызо-влак шке мурышт дене калыкым куандареныт.

Фестивальыште кумшо верым тыгай фольклор коллектив-влак пӧленыт: «Ош пеледыш» (Шаран район) да «Ош виче сем» (Илиш район). Кокымшо вер – «Кугу Шеде» (Нуриман район) да «Онгырйук» ( Благовещенск ола).

Финн-угор калыкын исконно-калык творчествын II-шо региональ фестивальыштыже Мишкан район гыч «Ныжыл сем» мурышо ансамбль сеҥен.

Мемнан район гычат «Амче вел», «Рвезе кумыл» да «Керей сем» фольклор ансамбль-влак да молат миеныт да участвоватленыт.

Ӱярня пайрем мучаште чучелым йӱлатеныт.

А. Зайнетдинова