Марий эстрадышке – икымше ошкыл

Марий эстраде у мурызо-влак дене пойдаралтеш. Иктыже – мемнан кундемнан Калтаса районысе Амчемучаш ялын эргыже, И.С. Палантай лӱмеш тӱвыра да сымыктыш колледжын хор пӧлкаштыже 2-шо курсышто, тунемше Мирослав Арсланов. Кодшо ийын лекше «Аваем, ачаем», «Улат пеленем» мурыжо-влак рвезым марий муро аланышке конденыт. Нуным ВКонтакте соцкылыште шуко еҥ колышт сеҥен, ойыртемалтше йӱкшым шижын шуктен.

Кум ияшак мураш тӱҥалын
Юмын пуымо мастарлыкшым илышыште эн кугу пӧлек шотеш ужман. Тудым жапыштыже шижын моштыман да вияҥден толман. Куд шочшан ешеш шочын-кушшо Мирослав 3 ияш улмыж годымак уремыште коштмыж годым мурен. Тыгодым тавалташ, кушталташ йӧратен. А 11 ияш улмыж годым гармонь дене шкеак шокташ тӱҥалын.

Рвезын ача-аважат усталык шӱлышан, мураш-кушташ йӧратыше улыт. Ачаже – гармоньчо, аваже – мураш тале. Ача-аван концертыште выступатлымыштым чӱчкыдын ончен, Мирослав марий фольклорлан шӱмаҥын, нунын деч примерым налын. 2-шо классыште тунеммыж годым клубысо «Ош пеледыш» йоча ансамбльышке кушташ, мураш коштын. Тыгак тӱрлӧ концертыште гармонь дене шоктен.

«Ачамым ужын, гармонь дене шокташ тӱҥалынам. Тудо ты семӱзгарыште могай паҥга-влакым темдышташ, кузе семын лукташ ончыктен. Ойлымыжым шарнен кодын, шкеак гармоньым шокташ тунемынам. Калтаса велысе марий семым поснак шокташ келшен.

Клубысо «Ош пеледыш» йоча ансамбль дене ме пошкудо яллашке концерт дене кудалыштынна, конкурслаште участвоватленна. Кызыт тушто лач ¢дыр-влак гына мурат-куштат.

Школышто шуэн муренам. Туге гынат районысо южо мурымо конкурсышто шкем тергенам. Тӱҥ шотышто, спорт дене пеҥгыде кылым кученам. Футбол деч посна тыгак районысо президент таҥасымаште ӱчашенам», – ойла Мирослав Арсланов.

9-ше класс деч вара Нефтекамск оласе шуко профилян училищыште электромонтажниклан тунемын. Кок ият пеле гыч, дипломым налмеке, Марий кундемышке И.С.Палантай лӱмеш тӱвыра да сымыктыш колледжышке тунемаш пура.

«Авамым шоналтен, Йошкар-Олашке тольым. Тудат ончыч ты колледжыште хор пӧлкаште тунемын. Но лекше нелылыклан кӧра тушеч каяшыже верештын. Эн ончыч тӱрлӧ семӱзгар дене шоктымо пӧлкашке йодмашым пуышым. Но вара мыйым хор пӧлкашке ӱжыч. Тыште тунемаш келша. Шуко жапым вокаллан ойырем. Арнялан кок гана тыгай занятийышке коштам. Тиддеч посна гармонь, фортепиано дене шокташ тунемам. Тидлан занятий, посна кружок-влакат улыт.

1-ше курс гычак колледжысе «Жар птица» хор ансамбльыште мурем. Тунам коллектив дене Чебоксар олашке «Золотая колыбель» конкурсышко миенна, тыгак Марий Элысе южо районышто лийынна. Но варажым коронавирус шарлыме дене нигушко лектын кошташ йºн ыш лий», – ойла рвезе.

Муро-влак лектыныт 1-ше курсым пытарымеке, июньышто «Улат пеленем», «Аваем, ачаем» мурыжо-влак почела лектыч, калык коклаште шарлышт. Тыге Мирославлан, еҥ-влак тӱҥалтыш пашажым аклен, поро шомакым возеныт, ойленыт. «Улат пеленем» муро самырык-влаклан келшен толеш гын, «Аваем, ачаем» мурыжо поснак чонеш логалеш, илыш, лишыл еҥ-влак нерген утларак шонаш тарата. Рвезе автор-влак дене пеҥгыде кылым куча, ончыкылыклан тӱрлӧ шонымашым илышыш пурташ чонжо й¢ла. Апрельыште репертуарже эше ик муро дене пойдаралтшаш. Ты гана такмак сынан мурым ямдыла.

«Калык коклашке лукшаш шуко мурем уло. Илалше, самырык-влаклан келшен толшо муро-влакым ямдылынем. Дипломым налмеке, вокалист семын шкем утларак вияҥден толаш шонем», – ойла тудо.

Волгыдо шонымашан, поро ончалтышан рвезе шонымашке шуаш тырша. Тӱҥалтыш уло гын, умбакыжым паша садак вораҥын толеш. Тидлан лач кумыл, тыршымаш да чытымашлык ситышт. А рвезын чылажат тидыже уло. Сандене Мирославлан усталык пашаштыже сай лектышыш шуаш тыланыме шуэш.

М.Чермакова ямдылен, Кугарня газет.