Уныка да кугезе уныка-влак шучко сарым ынышт уж

Калмиямучаш ял гыч Ислибаева Алтынчась Минлигалиновнан 22 уныкаже да уныкаже-влакын 33 икшывышт уло. Алтынчась Ислибаевнан шӱм-чоныштыжо – нимучашдыме йӧратымаш да тургыжланымаш. Сандене Калмиямучаш ял гыч 89 ияш ӱдырамаш шке сайлымаш участкышкыже йӱкшым пуаш миен.

Алтынчась Минлигалиновнан илышыже куштылго лийын огыл, сар деч варасе йоча годсо жап. Сар тудын пиалан да куанле йоча годсо ийлажым авалтен налын, вес семын каласаш гын, тудын п¢рымашыжым локтылын.

Сар тӱҥалме годым Алтынчась Ислибаевалан 9 ий лийын. Ты ийгот гыч тудо пашам ышташ тӱҥалын. Нечке ӱдыр шорыкым кӱтен, чодыраште да пасулаште тыршен.

– Ял, озанлык, пасу да пасу, – шарналтен ойла кова. – Кугу да кумда пасулаште шӱкшудым сомыленна. Янаул олашке кок ий почела урлыкашлан йолын миенам. Икымше ийын тер дене шыдаҥым конденна, вес ийын – шӱльым. Варажым мешакым вачӱмбаке пыштен пасулашке нумалынна. Мландым куралынна, тырмаленна, ӱденна, шурным погенна, кыренна, элеваторыш колтенна. Чылажат кид дене ышталтын. Кочай, ӱдырамаш да икшыве-влак пашам ыштеныт, вет пӧръеҥ-влак фронтыш каеныт.

Алтынчась ковай, илалше улеш гынат, кокымшо кечын 2192 №–ан сайлымаш участкыш толын, тудыжо Калмиямучаш клубышто верланен, ойырен налме кандидатурыжлан йӱкшым пуэн.

– Мый эре сайлымаште участвоватлем, – ойла тудо. – Коштын кертам, сайлаш мием. А вес семын нигузе ок лий. Тиде мыйын порысем. Мемнан уныкана ден кугезе уныкана-влак шучко сарым ужшаш огытыл.

Алтынчась Минлигалиновнан уныкаже шуко. Пелашыже Исламай Ислибаев дене пырля мемнан героинялан кандаш икшывым шочыктеныт да ончен куштеныт. Ындыжым тудо уныка-влаклан эн поян кова улеш. Тудын 22 уныкаже да уныкаже-влакын 33 икшывышт уло.

– Теве пелашем гына ала-молан дыр илаш ӧрканен, – шӱлыкан ойла тудо. – Мыйым коден каен, кийыме мландыже пушкыдо лийже.

Таче ковам Алтынчась Людмила ӱдыржӧ ден Артем веҥыж дене ила. 89 ияш улеш гынат, тугаяк чолга да мутланаш йӧратышан. Ме районысо ял калык лӱм дене тудлан тазалыкым, кужу ӱмырым тыланена.

О. Айгильдина.