Еш илышым шинчасорта семын аралыман

2021 ий августышто Краснохолмский села гыч Шакировмыт шӧртньӧ юбилейыштым – 50 ий пырля илымыштым палемденыт. Селан кечыжын да Нефть да газ промышленность кечын Валерий Яндуганович ден Алья Семеновналан БР вуйлатыше Радий Хабиров деч саламлымаш адресым кучыктеныт.

1970 ий. Васола ял гыч Альям Уфасе ургымо училищым тунем пытарыме деч вара Калтасасе бытовой комбинатыш колтеныт. Тудлан улыжат 20 ий лийын. А ты жапыште Тошто Калтаса гыч самырык рвезе шке ача-аваж дене отпускышто лийын. Тудо Совет Армий радам гыч служитлен толын (Куйбышев, Казань ола-влак), Нефтекамскыште 37 №-ан технический училищым тунем пытарен да Белокатай УБР-ыште пашам ыштен.

Самырык еҥ-влак Тошто Калтасасе клубышто, куштымаште вашлиялтыныт, палыме лийыныт, икте-весыштлан келшеныт да умбакыжат пырля лийын решитленыт. Отпуск мучашке шуын, шонаш жап кодын огыл да 17 августышто самырык еҥ-влак мужыраҥыныт. Вате-марий семын нуно Белокатай районыш каеныт.

1972 ийыште самырык ешыште икымше икшывышт – Инна ӱдырышт шочеш. Кок ий гыч вате-марий Шакировмытым пӱрымаш мӱндыр йӱштӧ кундемыш – Якутск олаш наҥгая. Тыште Валерий Яндуганович шке специальностьшо почеш умбакыже пашам ышта.

Кеч-кунамат шӱм-чон шочмо-кушмо кундемыш шупшеш. Тыштат тыгак лийын. Валерий Яндуганович ден Алья Семеновна шочмо Калтаса районышкышт пӧртылыт, тыште кызыт марте илат. Ешыште эше кок икшыве шочеш: Ирина ӱдыр ден Эдуард эрге.

Ий-влак эртат… Мемнан ачана, Валерий Яндуганович, тӱҥалтыште Краснохолмский УБР-ште пашам ыштен, варажым, сулен налме канышыш лекмыж марте йӱдвелыште вахте йӧн дене тыршен.

Ятыр ий тыршен пашам ыштымыжлан Валерий Яндуганович нефтяной предприятийла гыч Почетан грамота ден диплом дене палемдалтын.

Алья Семеновнам районышто сай ургызо семын чыланат палат. 80-ше, 90-ше ийлаште вургемым ургаш, олмыкташ заказше ятыр лийын. Сандене ава шуко пашам ыштен. Авана тачысе кече мартеат урга, тудын шукертсе йолташ ӱдыржӧ – ургымо машинаже, тудым 70-ше ийлаште Тошто Холмышто хозсату кечытыште налын, уло. Урга, еҥ-влак «Уке» манын ок мошто. Еҥ-влакат тудын л¢меш шуко поро мутым ойлат.

Кызыт мемнан ачана ден авана сулен налме канымаште улыт. 50 ий пырля келшен илат. Ты жапыште икшыве, уныка-влак кугемыныт. Кызыт кугезе коча ден кова лияш ямдылалтыт.

17 августышто нунын пырля келшен илымыштлан 50 ий темын. Ты чапле пайремыштым нуно лишыл родо-шочшышт-влак коклаште палемденыт, шуко поро тыланымашым да саламлымашым колыныт.

Мемнан юбилярна-влаклан илышыштышт куаным, чулымлыкым да пеҥгыде тазалыкым тыланена.

Ирина Ильтубаева.