Мут да паша дене

Радий Хабиров, Башкортостан Республике вуйлатыше:

«Пытартыш ийлаште ме чыланат ушненна – чыла республике, пӱтынь эл. Мыланна СВО-ын участникше – тиде тӱҥ еҥ. Сандене ме тудлан чыла ыштышаш улына, вет нуно мемнан тыныс илышна верч кредалыт».

Вияш линий годым Республике вуйлатыше специальный военный операцийын (СВО) чыла участникшылан таум каласен да неле жапыште элын икоян улмыжын кӱлешлыкшым палемден. Ветеран-влаклан полшымо пашам саемдаш да у йодмашым шотыш налын тӧрлаташ кӱлеш манын, палемден Радий Хабиров. Нуным илышыш шыҥдараш да умбакыже финансироватлашлан, ты але моло полыш шотышто йодыш пурыжо манын, Отечествым аралыме фондыш йодын мийыман.

Тыныс илышыш пӧртылмеке, СВО-ын шуко ветеранже илышын тӱрлӧ сферыштыже полыш кӱлешлык дене тӱкна. «Защитники Отечества» фонд шуко задачым решатлымаште полша.

Ушештарена, 2023 ий 1 июнь гыч Россий Федерацийын чыла 89 регионыштыжо «Защитники Отечества» фондын филиалже-влак пашам ыштат. Фондын ик эн тӱҥ задачыже – тӱрлӧ полышым налмаште полшымаш. Тышке медицине да социаль реабилитаций, кӱлеш эм-влак дене ситарымаш, тыгак реабилитацийлан технический средствам пуымаш да санаторно-курортный эмлымашын услугыжо-влак пурат. Организаций тыгак ветеран-влакым угыч туныктымаште да пашаш вераҥдымаште полша. Кӱлеш лийме годым, инвалид-влакым кужу жап ончымо да илыш условийыште адаптироватлалташ полышым организоватла.

Калтаса районышто «Защитники Отечества» фондын социальный координаторжо лийын Гульфия Нагимовна Галиханова пашам ышта. Специальный военный операцийын чыла ветеранже да колышо салтакын шочшыжо-влак тудын деке полышым йодын миен кертыт.

Гульфия Нагимовнан мутшо почеш, фондын пашаже – тиде адресный сопровождений нерген историй, кунам тыште да кызытак ветеран да колышо салтак-влакын ешыштын тӱкнымӧ нелылык дене полшымаш.

Фонд гоч адресный полыш шотышто ятыр пример уло. Социальный координатор Гульфия Нагимовна икмынярышт нерген каласкалыш:

– Эше ик гана палемдем, Фонд полышым ончыктымо да организоватлыме сомылым шукта. Пурышо чыла йодышым вигак решатлаш тыршена. Мемнан дене ветеран-влак да нунын ешышт кӱлеш льготым оформитлыме, юридический да консультаций полышым налын кертыт. Кызыт ме СВО-ын ветеранже, инвалид-влаклан илыме верыштым адаптироватлыме йодышым решатлыме шотышто комиссийын пашажым палемдена. Лесхоз дене пуым ямдылаш делянкым ойырымо шотышто йодышым каҥашена. Калтаса район гыч «Зелёная роща», «Танып», «Янгантау» санаторийлашке санаторно-курортный эмлымашке СВО-ын ветеранже, нунын ватышт да авашт-влак миен толыныт. Боевой действийын ветеранже удостоверенийжым налаш полшена. Тыгак мемнан деке салтакын илалше ача-авашт илыш-йӱлаште полшаш йодын толыт – пареҥгым лукташ, лумым эрыкташ. Ты йодыш-влакым решатлан мыланна волонтёр-влак полшат. Самырык-влак кумыл шуын чыла пашам шуктат.

Фонд эше тыгай пашам шукта: ындыжым военнослужащий-влакын родо-шочшышт, район деч ӧрдыжкӧ лекде, ДНК тестым сдатлен кертыт. Социальный координатор-влак тунеммашым эртеныт да кӧргӧ могыр шӱргыначка гыч ДНК образецым налын кертыт. Погымо биоматериал Уфа олашке колталтеш.

«Защитники Отечества» фонд специальный военный операцийын ветеранже-влаклан да нунын ешыштлан эҥертыш улеш. Тудын пашаже кызытсе проблемым решатлымашке веле огыл, социаль чынлыкым уэш пӧртылтымашке виктаралтын. Организаций гоч налме полыш еҥ-влакын илышыштым вашталташ полша.

Сеҥымашын кажне историйже, эртарыме кажне акций – тиде ветеран-влак шкеныштым мондымо да кудалтыме семын ынышт шиж. Волонтёр да верысе власть дене пырля фонд ӱнашле сообществым ышта, кушто шке кӱлешлыкым да шонымашым илышыш шыҥдараш чыла йӧнат уло.

Мемнан обществыште эрласе кечылан ӱшанымашым да икоян улмашым шижмаш – жапын ӱжмашыжлан ик эн кӱлешан вашмут. Ветеран-влаклан полшымо кажне вий мемнан кумылнам пеҥгыдемда да неле жапыште иктыш уша.

Эльвира Мурсакаева