Клуб – ялын шӱм-чонжо

Вияш линийыште Башкирий вуйлатыше Радий Хабиров клуб-влак культура рӱдер семын  кӱлешан улыт, тудо яллаште илышым пойдара манын, каласен.

Башкортостан Республике вуйлатыше культурым вияҥдаш кӱлмӧ нерген умыла да верысе кӱкшытыштӧ культура кылым пеҥгыдемдаш виктаралтше инициативе-влаклан чолган полша. Сандене республикыште культура мероприятийым организоватлымылан гына огыл, а изи ола, села ден яллаште культурым вияҥдымылан виктаралтше инициативылан полшымылан тӱткыш ойыралтеш.

2021 ийыште «Арт-Курултай» культура форумышто Радий Хабиров «Земский работник культуры» республике программе тӱҥалме нерген увертарен.

– Мемнан дене Башкортостаныште «Земский доктор», «Земский учитель», «Сельский тренер» федераль да республике программе-влак  удан огыл пашам ыштат. Ындыжым «Земский работник культуры» программе лиеш, – каласен Радий Хабиров.

Тылеч вара «Земский работник культуры» программе пашам ышташ тӱҥалын, селалаште культура пашаеҥ-влаклан полшымо ик эн тӱҥ механизм, тудо шукырак самырык специалист-влакым ушаш полша.

Кузе кӱшнӧ палемденна ыле, ты программе 2021 ий гыч пашам ышта. Ты жапыште республикыште села ден изи олалаште пашам ыштыше  90 специалист полышым налын – нуно 500 тӱжем теҥге компенсационный тӱлам налыт. Ты окса илыме верым саемдашлан кучылталтеш. Тиде чоҥаш, чоҥымо материал-влакым налаш, ипотечный кредитым тӱлаш да тӱҥалтыш тӱлам пурташ.

Григорий Лисков, Калтаса район муниципаль районын культура пӧлкажын вуйлатышыже:

– Калтаса районышто, республикысе семынак, культура сферыште койынак саеммаш текшыралтеш. 2019 ийыште мемнан район территорийыште шуко клубым олмыктымо. Эртыше ийын «Культура» нацпроект почеш, Шоръялыште клубым олмыктымо. Республикын культура министерствыже культура учрежденийым вияҥдыме шотышто мероприятийым илышыш шыҥдараш оксам ойырен, тидыже капитально олмыкташ да материально-технический базым пеҥгыдемдаш полшен. Клубышто леведышым, кӱвароҥам, тӧрза ден омсам, электропроводкым вашталтыме. Тыгак тӱжвал да кӧргӧ отделкым эртарыме, сакыме туврашым вераҥдыме, клуб ончылым олмыктымо. Ты паша зданийын тӱжвал тӱсшым вашталтен, ындыжым культура мероприятийым эртараш сай условий уло. Вет тиде верысе калыклан моткоч кӱлешан.

Тыгак культурым вияҥдымашке калык ушалтеш. Тыге Калмаш ялыште ППМИ программе почеш, верысе калык клубыш газым пурташ шонат. Ты программе почеш, эртыше ийын Качкинтурай, а 2021 ийыште Кӧкыш ялласе клублаште ырыктыме системым капитально олмыктымо да газым пуртымо.

Эше ик ялым налына. Ӱлыл Качмаш ялсоветыш пурышо Кокла Качмаш эн изи яллан шотлалтеш. Тушто илыше калыкланат клуб кӱлеш. Нуно кок ий почела «Наше село» муниципаль проектыште участвоватленыт.  А 2023 ий июнь гыч Кокла Качмаш ялыште клубым чоҥаш тӱҥалыныт.

«Мо тугай ялысе клуб? Ты йодышлан культура пӧлка вуйлатыше Григорий Лисков  тыге вашештыш: «Ялын шӱмжӧ да чонжо». Вет клуб-влак изи яллаште культура илышын ойыраш лийдыме ужашыже улыт, нуно йӱлам веле огыл аралат, а верысе калыкын творчествыжлан у йӧным почыт.

Елена Акиева